Shillong, Iaiong 24 : U MLA jongka AITC na Chokpot Constituency u Lazarus Sangma u la ong ba yn ym don uwei ruh u MLA ka AITC u ban leit pynïasoh sha ka NPP.
U la pynshai ïa kane hadien ba ki don ki nongïalam ka NPP kiba la kam ba kin don bun ngut ki MLA ka AITC ki ban wan ban pynïasoh bad ka NPP shwa ka Eelction MLA 2023. U la ong ba kane ka dei ka jingkam kaba ym don nongrim satia.
U la ong ba ka NPP ym dei tang ba ka khroh ïa ki MLA ka AITC hynrei ka khroh bad pyrshang ban khring ïa ki MLA na kiwei kiwei ki seng saiñ pyrthei ruh hapoh ka jylla. “ Hynrei ka NPP ka dei ban kynmaw ba kan ym lah da lei lei ruh ban khwai ne khring ïa ki MLA kiba don la ka nongrim” ong u Sangma.
“ Yn ym don ki MLA ka AITC kumba long mynta bad wat ha ki por ban sa wan ruh ki ban leit pynïasoh sha ka NPP namar ka NPP lei lei kam don u nongïalam uba tbit” ong u Lazarus.
U la ong ba u myntri rangbah ha ka jaka ba un shim ka jingbah khlieh halade hynrei bunsien u pyrshang ba kiar bad ïaid da kawei ka lynti ban tynrong ki jingkynnoh ha kiwei bad ka nuksa ka long na kane ka jingïapynbeit pud mynta kaba ula leh hi hynrei ula tei pop pynban ha u Dr Mukul Sangma u Myntri Rangbah ba rim ka jylla.
U Lazarus u la ong “ Une u Myntri Rangbah ba mynta u dei uba tlot tam bad uba shah pynïaid ha kiwei na kata ka daw ym don ki MLA ka AITC ki ban kwah ïatrei lang bad u namar ngi la don u nongïalam uba tbit u Dr Mukul Sangma”.
Une u myntri rangbah ula pynjot thiaw ïaka jylla khamtam ha ri lum Garo. Lada phai sha baroh ki liang naduh ka roi ka par, ka pule puthi bad ter ter ka jylla kala nang hiar nang hiar. U la ong shuh shuh ba baroh ki jingkam jongka NPP ha ki lad pathai khubor ki dei kiba shu thok shu shukor suda la ka dei ha ka jingpynbeit pud pynbeit sam, ka pule puthi kaba ki ong ban buh hakhmat eh hynrei ka la nang hiar arsut bad kata ka jingpyndep ia ki jingthrang bad jingpoh sniew u nongialam ka NPP u (L) P.A Sangma ia kaba ym shym la urlong haduh mynta.
