Yn ym don jingktah ïa ki trai jylla, 3 kiba la pan License: James

Shillong, Nailur 12 : Ka sorkar ka la pynkhreh ban pynïaid beit shakhmat ban pyntreikam ne plie ïa ka Casino namar u Myntri ka tnad Taxation u James K Sangma mynta ka Lah Sngi U Blei u la ong hapoh ka ïing dorbar ba ka Meghalaya Regulation of Gaming Act and Rules 2021 ka pynthikna ba yn plie ïa kane ka jaka ym na ka bynta ki trai jylla hynrei tang na ka bynta ki briew kiba na shabar ka jylla bad ïa kiba na shabar ri kiba kwah ban ïalehkai ïakhalai haba ki wan kai ne wan donkam sha kane ka jylla.
U la ïathuh ruh kumba long mynta ki la don lai tylli ki kompani kiba la pan licence ban pynïaid ïa ka Casino ha katei ka jaka ha Jorabad.
“ Nga kwah ba pynthikna ba kane ka jaka ban buh ïakine ki kam ïalehkai khalai kam dei na ka bynta ki trai jylla bad ki trai jylla kim lah ban rung sha kane ka phyllaw lait noh tang ki bar jylla bad ki bar ri kiba wan jngohkai sha ka jylla ne kiba wan na ka bynta ki kam ki jam ne ka khaïi pateng jongki” ong u James haba jubab ia ka Call Attention Motion ba la wanrah da u MLA ka Umroi Constitueny bad Chief Whip ka Liang Pyrshah u bah George B Lyngdoh.
U la ong shuh shuh ki trai jylla kin ïoh jingmyntoi tang haka jingïoh kam ïoh jam, ka jingkyntiew ïa ka put ka tem tynrai, ka kolshor, ka shad ka mastieh, ki rukom thaiñ jaiñ tynrai, ki jingbam tynrai, ki jingthaiñ kti, ki jaiñ ryndia muka bad kiwei kiwei.
ïa kane ka mat la wanrah hapoh ka ïing dorbar da u bah George halor ka jingmih khubor ba ka Joint Action Committee Against Casino (JACAC) kaba la seng da ki seng bhalang bad ka Synjuk ki Rangbah Shnong ban pyrshah ïa ka jigthmu jongka sorkar ban plie ïa ka Casino ha Ri Bhoi District.
U James u la ong ka tnad Taxation hashwa ba kan thaw ïa ki kyndon ha kane ka Aiñ, ka la dep buh ïa kine ki kyndon, ka la dep buh ha ka website bad pynmih ruh ha ki kot khubor ha kaba la kyntu ïa ki nongshong shnong ba kin ai ïakino kino ki jingai jingmut la ki pyrshah ne pdiang bad ïa kane la pynmih ha ki kot khubor ha ka 27 tarik Nailar 2021. Hynrei haba ym don ba phah ïakino kino ki jingai jingmut ka tnad ka la pynskhem ïakine ki kyndon aiñ da kaba kynthup ruh ïa ki kyndon kumno ba ïada ba ki trai jylla kin ym ïoh ban ïashim bynta.
U la ong ka sorkar ha ka por ba ka thaw ïa ka Meghalaya Regulation of Gaming Acts and Rules 2021 ka la buh ruh ïaki kyndon ba ki trai jylla kin ym ïoh ban rung sha phyllaw ba la buh ïa kine ki kam ïalehkai ïakhalai.
Ul a ong ba ka Rule 19 (x) ka la kdew shai ba kiba lah ban rung kin long tang kito kiba don ka ID bad kata ruh kiba dei na shabar ka jylla Meghalaya bad kane ka kdew shai ba ki trai jylla kin ym lah ban rung ha kane ka jaka.
Shuh shuh u la ong ym lah ban len ka jylla ka la ïoh ka jingkyrkhu na ka jingdon kiei kiei kiba itynnad ha ka hyrei ka sorkar ka la ïohi pat ba ki jylla ba marjan ruh ki la ïabeh shakhmat ban kyntiew ïaki kam jngohkai namar ki ïasyriem hi ki sawdong sawkun jongki ba ka jylla Meghalaya, nalor kata ki don ruh kiwei kiwei ki jingkhring ia ki nongwan jngohkai kum ka histori, ka kolshor, ki jingbuh jingsat mynbarim, ki jingohshrong dur bad ter ter.
Kumta ka sorkar ka hap ban wad ki lad ki lynti kumno ban dang khring ïa ki nongwan jngohkai sha kane ka jylla ym tang ïa kiba pdeng ka jingïoh jingkot hynrei wat ïa kiba riewspah ruh. U la ong ka kam ïakhalai ka dei kaba la don lypa ha ka jylla bad ngim lah ban len ïa kane da lei lei ruh. “ Ngi don ka jingthoh tim, ka jingïathong ha ki kam siat khnam, ïa turmasi, ïa puh syiar, ki kam khalai khruk khruk bad ter ter”. Ka jingthoh tim ka dei kaba la don lypa tad haduh ban da ithuh ïa ka da ka sorkar ha u snem 1982.
U la ai nuksa ba ka jylla kum ka Goa bad Sikkim ki la lah ban kyntiew ïa ka kam jngohkai da kaba ithuh ïa kane ka kam ia khalai bad kine ruh ki la buh da ki kyndon ban ym shah rung ïaki trai jylla sha kum kitei ki jaka khnang ba kan ym don kano kano ka jingktah. U la ong ka jingithuh ïa kane ka kam ka la wanrah ka jingmyntoi bad kyntiew bha ïa ka kam jngohkai.
U la ong ruh lada ka sorkar kam ithuh bad wanrah da ka aiñ kan long kaba eh ban khang lad ïa ki briew ban pynïaid beaiñ ïa kane ka kam bad lada ka long beaiñ wat ki khynnah rit shynrang bad kynthei ruh kin ngop beit.
Ha kane ka juk jong ki kor ki bor teknoloji kaba la wanrah ka jingkylla ha ki liang bapher bapher bad ym lah ban shu shah kynoi khlem da ïabeh shakhmat. Kumta ban wanrah da ka aiñ ka long kaba donkam ban khang lad ïakino kino ki kam leh beaiñ halor kane ka kam.
U la ong ruh ba ka jingkynnoh ba ka sorkar ka khlem wanrah ka roi ka par ha Ri Bhoi kam long kaba shisha namar ka Ri Bhoi ka ïoh ka jingithuh kum kata kawei ka district ba la kiew bha ban wan balai ha ka ri ka dei namar ka sorkar MDA ka la kyntiew bha ïakane ka District. Kumta u la ong na ka bynta u Myntri Rangbah ka jylla bad ka sorkar hi baroh kawei “ Nga kwah ban phla hapoh ka ïing dorbar ba ngi kwah ban rah ïa ka nam bad burom ka Ri Bhoi ha ka kyrdan ba nyngkong haki por ki ban sa wan” ong u James.