Shillong, Nailur 03: U Nongïalam ka BJP ba dei peit ïa ka BJP ha ka jylla u Chuba Ao ha ka sngi Saitjaiñ u la ong ba hadien ka ilekshon ha u snem 2023 yn ym don kino kino ki seng saiñ pyrthei lada ym don lang ka seng BJP kiban lah ban thaw sorkar.
Haba ïadei bad ka jingkren ki nongïalam ka NPP khamtam eh u National President jong ka u Conrad Sangma ba na ka liang jong ka kan leit marwei ha ka ilekshon ha u snem 2023 u Ao u la ong, “Ngim lah ban ai hukum ïa ki ne ban leit nguh leit dem ïa ki hynrei tang kane kawei kaba thikna ba lada khlem ka BJP yn ym don mano mano ban lah thaw sorkar”.
haba ïadei bad ka jingweng jingkyrshan jong ka BJP ïa ka sorkar MDA na ka liang jong u u la ïathuh ba ka BJP kan sa shong pyrkhat ha kine ki shibnai ban wan ban shimrai la kin weng noh na ka sorkar MDA.
“Ka BJP kan sa pyrkhat kaei ka sienjam kaba kan shim bad ïa kane ngin ïakren ruh bad u Nation President ka party” u la bynrap.
Haba kren halor ka jingweng noh ïa u President jong ka BJP u Earnest Mawrie u Ao, u la ong ba kum ka BJP ka party kaba la ïar kan don beit ka jingbakla ka ktien ka thylliej bad ka jingbym sngewthuh ruh ïa kaei kaba u nongïalam u kren hynrei kum ka party kin ïa pynbeit lada ka don kaba kum kata ruh u la kam.
