Yn wanrah ka Liang Synshar ïa ka Kaiphod Reservation Policy hapoh ïing Dorbar Thawaiñ

Shillong, Kyllalyngkot 15 : U Myntri Rangbah ka Jylla Conrad K Sangma ha ka sngi Palei, ula pynbna ba ka Sorkar ka long kaba kloi ban ïakren halor ka kaiphod jong ka Expert Committee on State Reservation Policy, kaba la khmih lynti ban sa wanrah ha ka Dorbar ban wan ka ïing Dorbar Thaw Aiñ da ka Liang Synshar.
“Ngin sa lah ban pynbna paidbah ynda ngi lah wanrah hapoh ka ïing Dorbar Thaw Aiñ ka ban sa long shen. Nga thikna ba ngin lah ban wanrah ïa kiei kiei baroh ha ïing Dorbar Thaw Aiñ” ula ong haba ïakren bad ki nongthoh khubor.
U Conrad ula batai ba ka daw ba slem ban pyllait ïa ka kaiphod ka dei namar ka jingkyllaiñ bad ka jingjrong, kaba donkam ban hap bishar thik pa thik. “Ka dei ka kaiphod kaba jrong bha-da ki hajar hajar ki sla ki don. Man ki kyntien ki long kiba kongsan ha ka, kumta kam long kaba suk ïa ngi ban shu ai tang ïa ki pasoh jong kiei kiei baroh” ula bynrap.
U Myntri Rangbah ula kular ba ka Kynhun Myntri kan sa ïakren shen ïa kane ka kaiphod, lehse ha ka jingïalang ban sa wan.
“Ngin shong ïa ka jingïalang jongka Kynhun Myntri lashai ka sngi bad lehse ngi lah ban ïakren ïa kane….kumta, hapoh ka shitaiew lane shiphew sngi, ngin sa lah ban pynbna” ong u Conrad.