Yn wanrah biang ka KHADC ïa ka Clan Bill ha ka Dorbar Lyiur

Shillong, Jylliew 22 : Ka Executive Committee jong ka KHADC ha ka sngi Ba-ar ka la rai ban wanrah biang ïa ka Khasi Hills Autonomous District (Social Custom of Clan Administration) Bill, ha ka Dorbar Lyiur kaban sa long shen ha u bnai ban wan.
Lah ban kdew hangne, ba ka Clan Bill kadei kaba thmu ban khanglad ïa ki Khasi ban bud ai jait kpa lane ban shim ïa ka jait jong u kpa lane wat ha ka rukom spel dak ïa ka jait.
Haba pyntip ïa kane ha ki lad pathai khubor, u CEM u la ïathuh ba mynshwa ki la dep phah ïa kane sha u sorkar bad ruh sha u Lat hynrei ka la wan phai biang. “Kumta hadien ba kane ka EC ka la shimti ha KHADC na ka liang jongnga ba peit ïa ka Law nga la phah biang ïa kane ka Bill sha ka komiti kaba kyrpang ban pynbit pynbiang ban leh bin ba pin ban pynbeit ïa ka,” u la ong.
Shuh shuh u la ïathuh ba hadien ba katei ka kynhun ka la dep ban phah sha ka EC, mardor ki la phah sha baroh ki MDC ban pan ka jingai jingmut ne ka jingkynthoh hynrei ym shym la don satia ka jingai jingmut. “Kane kamut ba ki la pdiang bad mynjur ïa kane ka Bill. Na kata ka daw ngin sa rah noh ïa ka ha ka Dorbar kaban sa long shen,” u la bynrap biang.
U CEM u ong ruh ba ki khmih lynti ba ynda la ïoh jingmynjur ïa kane ka Bill, ba la maitphang da u CEM barim ka Council, Bah HS Shyllakan long ka jingkyrkhu kaba khraw ïa ka Jaidbynriew hi baroh kawei.
Ha kane ka sngi, ka Executive Committee ka la mynjur ruh ïa ka jingkyrpad jong ka Hima Mylliem ban pynkylla ïa ki kyndon jong ka Hima Mylliem da kaba shah noh nangne shakhmat ba kan thung ïa ki nongsynshar shipor (Acting) la ka long ïa ki Acting Sordar, Acting Syiem Raid ne Acting Rangbah Shnong.
“Nangne shakhmat kan ailad ïa ka Hima Mylliem lada don kino kino ki shnong ki bym pat lah ban thung da uba pura lane don ka huri hura yn ailad ïa u Syiem ban thung da u Acting,” ong u CEM.