Yn wanphai ïing ki nongïalam ka HNLC, shen yn sdang ka jingïakren ïasuk

Shillong, Naitung 19: U Bah Sadon K. Blah, u rangbah ba la thung da ka HNLC ban long kum u ksiang ha ka jingïakren ïasuk bad ka Sorkar, u la ïathuh ba ka Sorkar ka la mynjur ban shah ïa ki nongïalam ka HNLC ban wanphai sha ïing (safe passage) na ka bynta ban ïashim bynta ha ka jingïakren ïasuk bad ka sorkar pdeng bad sorkar jylla.
Haba ïakren bad ki nongthoh khubor ha ka sngi Baar ha Shillong Press Club, u Bah Sadon, uba long ruh u President ka Seng Hynñiewtrep National Youth Front (HNYF) u la ïathuh ba ki nongïalam ka HNLC ryngkat bad u Ksiang na ka liang ka Sorkar, u Bah Peter Dkhar, u ophisar ba la shongthait jong ka sorkar, ki la ïakynduh lai sien ban ïakren ïapynbeit ïa kane ka jingïakren ïasuk. “Ha kane ka jingïakynduh, kaba kongsan ka long ba ngi la lah ban ïamynjur na ka bynta ka jingwanphai ïing jong ki nongïalam ka HNLC ban ïashim bynta ha ka jingïakren ïasuk”, u la ong.
Haba pynpaw ka jingsngewkmen halor kane, u Bah Sadon, u la ai khubleiu ruh ïa u Bah Peter uba la ïatreilang na ka bynta kane ka kam. Haba la kylli la kan don shuwa ka jingpynbna ban sangeh ïasiat(cease fire) shuwa ban sdang ka jingïakren ïasuk, u Ksiang ka HNLC, ula ong ba ka rukom treikam mynta ka lah kylla bad kan sdang shuwa da ka jingïashong ha ka miej jingïakren ban ïapynbeit ïa ki jingdonkam.
Haba kylli mano ki ban mihkhmat na ka liang ka HNLC ha ka jingïakren ïasuk, u Bah Sadon u la ong ba kiba la wan ban ïakynduh ïa ki briew sorkar ki long u Foreign Secretary bad u Political Secretary bad lehse ynda la sdang ka jingïakren ïasuk ki lah ban wan sa ki nongïalam kiba kham halor kum u Secretary bad kiwei kiwei.
U Bah Sadon um shym la pynpaw halor kiei ki mar kiba kongsan ba kane ka jingïakren kan sdang, namar u la ong ba kane ka jingïakren kan long shuwa halor ka jingïasuk bad kumno yn pynïaid shaphrang ïa kane ka jingïakren.
Halor kiwei kiwei ki jingdonkam kum ka jaka sah ki nongïalam ka HNLC haba ki wan ban ïakren ïasuk, u Bah Sadon u la ong ba kane kan shong ha ka jingpynbeit ka sorkar. U la ong ruh ba ym baroh ki dkhot ka HNLC ki ban wan phai ïing noh, hynrei kin wan shuwa tang ki nongïalam ki ban ïadon bynta ha ka jingïakren ïasuk.
Haba kylli halor ka jingsngew jing u halor kane ka jingwan ïakren ïasuk ka HNLC, u Bah Sadon u la ong ba ym lah ban len ba ka HNLC ka don bun ki nongkyrshan bad lada ym lah ban wanrah ha ka miej jong ka jingïakren ïa ka jingpisa jingmut, ïa ka jingbitar jong ki Samla, ym lah ban mutdur kaei kaban mih ha ki snem ki ban wan. U la ong ruh ba lada la lah ban ïatai bad ïathir ïa ki jingeh jong ka jaidbynriew, ïa ki jingeh jong ka jylla lyngba kane ka jingwan ïakren ka HNLC, ka shongsuk shongsaiñ kan wan ha ka jylla bad kane kadei ka bynta kaba konsgan.
“Lada lah ban ïapynbeit ïa ki jingeh kiba bun lyngba kane ka jingïasuk, nga ïohi ba ka jingshongsuk kan wan ha ka jylla,” la ong u Bah Sadon.