Shillong, Ïaïong 14: Ka Myntri Khynnah jong ka sorkar pdeng ba khmih ïa ka Tnad Women and Child Development, ka Savitri Thakur, kan wan jngoh ïa ka jylla Meghalaya lai sngi lynter naduh ka 15 haduh 17 tarik Ïaïong, 2025.
Ha kane ka jingwan jong ka, ka Myntri kan pynlong ïa ka jingïalang peit bniah bad ka tnad Social Welfare jong ka sorkar Meghalaya, kaba pynleit jingmut ha ki skhim ba la kyrshan da ka sorkar pdeng bad ki prokram hapoh ka tnad Women and Child Development. Kan leit ïakynduh ruh ïa u Lat ka jylla Meghalaya bad pynlong ïa ka jingbishar bniah ha ka kyrdan district ha East Khasi Hills katkum ki jingbthah jong ka tnad Development of North Eastern Region (DoNER).
Ha ka 16 tarik Ïaïong, ka Myntri kan leit jngoh ïa ki jaka treikam ba kongsan ha nongbah Shillong, kynthup ïa ka One Stop Centre ha Ganesh Das Hospital, Shakti Sadan ha Mawroh, bad kawei ka Child Care Institution ha Mawkasiang. Nangta kan sa leit jngoh ïa ka Community Health Centre, Anganwadi Centre ha Mawsmai, bad jurip ïa ki projek kam pynroi kiba hap hapoh ka MGNREGA bad PMAY (G) bad kan sa leit jngoh ruh ïa ka Aqua Park cum Visitor Information Centre ha Khliehshnong bad jurip ïa ki surok PMGSY ha katei ka thaiñ.
