Shillong, Nohprah 09 : Ka North East Student’s Organistion da kaba bteng ïa ka jingpyrshah kaba jur ïa ka Citizenship (Amendment) Act, 2019, ka la rai ban pynlong da ka jingwah lama ïong ha kylleng ki jaka paidbah jong ki 7 tylli ki jylla ka thaiñ shatei lam-mihngi jong ka Ri ha ka 11tarik mynta u bnai.
Ha ka kyrwoh, u Chaimran ka NESO, Bah Samuel Jyrwa u la ong ba ka seng ka la pynbna ba ha ka 11tarik mynta u bnai yn ïai rakhe ïa ka kum ka ‘Sngi Badum’ ha baroh ka thaiñ shatei lam-mihngi jong ka ri.
“Kumta, da kaba snohkti lang bad kane ka sngi badum, ka NESO ka la rai ban pynlong da ka jingwah lama ïong ha baroh ki jaka ba kongsan jong ki 7 tylli ki jylla,” ong ka kyrwoh.
Shuh shuh u ong ruh ba ha ka 11tarik Nohprah, 2019, wat hapdeng ka jingpyrshah kaba jur na ki jaidbynriew trai muluk jong ka thain shatei lam-mihngi jong ka Ri pyrshah ïa ka CAA hynrei ka sorkar pdeng kam shym la pynsngew hynrei ka la ïaid beit shakhmat bad mynjur ïa katei ka aiñ kaba la tip kum ka Citizenship (Amendment) Act 2019.
“Kane ka jingrakhe ka long ban ai ka khubor sha ka sorkar India ba ngi pyrshah jur ïa ka CAA bad ruh ha kajuh ka por ban pynkynmaw ïa ki briew jongngi ïa ka jingleh bym hok jong ka sorkar India ïa ki trai ri trai muluk jong ka thaiñ shatei lammihngi jong ka Ri,” u la ong.
