Shillong, Naitung 12 : Ka Meghalaya Chess Association ha ryngkat ka jingïatreilang bad ka Khasi Students’ Union kan rakhe pyndonburom ïa ka jingdap ba 187 snem jong ka jingïap u Tirot Sing Syiem da kaba pynlong ïa ka Third Tirot Sing Syiem Memorial Rapid Chess Championship 2022 ha ka 16 tarik Naitung, 2022 naduh ka por 9 baje mynstep ha Government Girls Higher Secondary School, Shillong.
Kane ka jingïakob ïalehkai Chess kan long ha ki ar bynta – ka Open bad Under-13 bad yn pynlong da ka Swiss system kaba hynriew wat bad ka por kan long shiphew minit san sekhon. Kiba ïashimbynta ha kane ka jingïakob ki lah ban phah ïa ka kyrteng, ka rta bad ka jaka sah lyngba ka SMS lane WhatsApp ha u numbor 8258898775 lane lyngba ka e-mail ha meghalayachess@yahoo.com . Kane ka long katkum ka kyrwoh na u Bah Bonney J. Kharbani, General Secretary ka Meghalaya Chess Association, Shillong.
