Shillong, Nailur 16: Ka jylla Meghalaya mynta ka dang trei shitom ban wanrah ka jingkylla ha ka kam rep kam riang na ka bynta ban kyntiew ïa ka ïoh ka kot jong ka jylla bad ïa ka kynhun ki nongrep lyngba ka jingïarap jong ka CIAT, New Delhi, CGIAR, ka World Future Council, IFOAM-Organics International, IFAD bad ka German Cooperation ki la wanlang ban pynlong ïa ka Meghalaya State Stakeholder’s Consultation Meet ha ka 17 tarik mynta u bnai, 2024 hapoh ka auditorium jong ka College ka PG Studies ha Agricultural Sciences (Central Agricultural University, Imphal), Umïam, Meghalaya.
Ha kane ka prokram la khmih lynti ban wan ïa shim bynta da kiba bun ki nongrep, ki nongsengkam la jong bad kiwei kiwei.
Ha kane ka jingïasyllok kan don ka jingpynleit jingmut kumno ban wanrah ka jingkylla ha kaba ïadei bad ka jingkyntiew ïa ka jingpynmih bam bad kumjuh ruh ïa ka ïoh ka kot jong ki nongrep.
Ha kane ka prokram na ka liang ki tnat bapher bapher jong ka jylla kiba don ka jingïadei bad ka kam rep bad ki jingpynmih bam, ki sengbhalang kin sa wanrah ïa ki mat bapher ban pynsngew ha kane ka jingïalang bad ha kane ka prokram yn don lang u Myntri ka tnat Animal Husbandry, u Bah A.L. Hek bad u Vice Chancellor, CAU, Imphal, Dr. Anupam Mishra.
La ong ba ïa ka ‘Agroecology Himalayas Task Force’ la dep ban thaw ha u snem 2023 da ka jingthmu ban kyntiew ïa ka rep ka riang. La ong ruh ba ka jingbei pisa halor kane ka wan na ka German Federal Ministry for Economic Cooperation and Development (BMZ) bad na ka International Fund for Agricultural Development (IFAD) bad da ka World Future Council (WFC) bad IFOAM – Organics International ki ban ai jingmut ïa ki sorkar ha kane ka thaiñ bad ban pynsuk ïa kane ka kam kaba ïadei bad ka kam rep bad ka jingpynmih bam.