Shillong, Jymmang, 10: Ka jingïalang Kur kut snem jong ki Doloi/Hat/Sohpdang kaba long ha ka sngi Saitjaiñ ha shnong Niangbarilum, Ri Bhoi District ka ïatai sani halor ka jingïadei kur bad ki jaid Doloi/Hat/Sohpdang bad kiwei pat ki jaid kum ki Lyngdoh, Sohtun, Pambah bad kiwei na ka jingkylla jaid ki ñi ki Kong naduh hyndai hynthai kaba lah ban ïalam bakla ha ka jingïadei shikur shijait bad kaba buh jingma ha ka shongkha shongman ïa ki bym tip ïa ka tynrai jong ka jaid lajong, namarba ym don ki jingthoh jingtar naduh mynshwa bad ïa ka jingïadei shikur la shu tip da ki khana ktien na ki ‘Beimen-Wohmen’ ba ki dei shikur.
Ha kane ka jingïalang da kawei ka jingmut ka la rai ban jurip bniah ïa ka tynrai halor ka jingïadei kur jong ki Doloi/Hat/Sohpdang bad ki Lyngdoh, Sohtun, Pombah Shadap bad kiwei.
Ka jingïalang ka la bynshtep ïa kane ka kam ha ka Executive Committee jong ka Kur ban jurip bniah khnang ban lap ïa ka jingshisha halor ka jingïadei kur bad kiwei ki jaid khnang ba kan long kaba shai khamtam ban lait na jingma ha ka shongkha shongman hadien habud.
La rai ruh hadien ba la jurip bniah yn sa pynmih syndon da ka kot ban pynskhem ïa ka jingïadei kur hapdeng ki Doloi bad kiwei khnang ba kan ym ïalam bakla ïa ki khun ki kti ha ki pateng ki ban sa wan.
Ka jingïalang ka la rai ruh ban pynkiew ïa u synniang kur na ka T.100 sha ka T.150 na bynta ban pyntyllun ïa ki kam ka seng kur bad kumjuh ban ïarap katba lah ïa ki para kur ha ka pang ka shitom bad ka ïap ka im bad lada don kino kino ki jingjia bym poi pyrkhat na ka jinglynshop ka mariang.
