Yn theh pisa ka sorkar ban kyntiew shuh shuh ïa ki kam ïalehkai sport ha ka jylla

Tura, Kyllalyngkot 20 : Ka sorkar kan ïai bei ne theh pisa ban kyntiew ïa ki kam ïalehkai sport hapoh ka jylla da kaba pynbha ïa ki jaka ïalehkai baroh, ban pynkhlaiñ ïa ki jaka hikai pyntbit ïa ki samla ha ki jingïalehkai ba ki don sap.Ki samla ki dei ban dang beh sha ka thong da ka jingmut jingpyrkhat kaba shai bad khamtam ba kin long ki nongïalam jongka lawei ban wan” ong Myntri Rangbah ka jylla u Conrad K Sangma haba kren kum u kongsan ha ka jinghap pyrda ïa ka Meghalaya Games kaba San ha Tura mynta ka sngi.
U Myntri Rangbah u la pynbna ruh ba ka Meghalaya Games kaba Hynriew kan long ha Jowai, West Jaintia Hills. “ Kumta kumba ngi la khylliap lama noh ïa kane ka Meghalaya Games ba San to ngin phai khmat sha ka Meghalaya Games ba Hynriew ha u 2025 ka ban long ha Jowai. Ngi kyrmen ba ki jingïalehkai sport kin dang kiew shuh shuh ha ka jylla na kata ka daw la pynlong na kawei ka District sha kawei pat namar ngi kwah ban ïohi ba ka Meghalaya kan long ka jylla kaba kiew ha baroh ki liang” ong u Myntri Rangbah.
“ Ka jingpynlong ïa kine ki jingïalehkai sport ka long kum ka jingplie lad plie lynti ban ïatbeh wat ban pynlong ïa ki ‘World Class Sport’ bad lyngba kane kan ïarap ruh ïa ngi ban lah ba pynkhreh ïa ka Notional Games namar katto katne na ki jingïalehkai yn pynlong ha Tura ruh” ong biang u Myntri Rangbah.
Haba ai jingïaroh iïa ka jingjop ha ka jingpynlong ïa ka Meghalaya Games kaba San, u Myntri Rangbah u la ong “ Kumba ngi la ia khublei kti bad kane ka jingïalehkai kaba phuh ba phieng nga pynpaw ruh ka jingsngewnguh ïa baroh kiba la ïadon bynta ban pynlong ïa kane ka Meghalaya Games kaba jop ha Tura. Nga ai khublei ruh ïa ki paid nongshong shnong jongka Tura kiba la ïatrei lang ban pynlong ïa kane ka Meghalaya Games kaba jop. Nga ai khublei ïa ki skul kum ka Don Bosco, Monfort, Durama College, BSF, 2nd MLP Battalion bad ïa baroh kito kiba ym lah jer kyrteng kiba la don bynta lang ha kaba pynlong ïa kane ka kam kaba jop. Ha une u snem ki don 23 tylli ki jingïalehkai bad kiba ïoh takma ki la palat ïa ka 400. Lyngba kane la ïohi ruh ba ki don ki samla ki ban wanrah nam ia ka jylla ynda ki leit ban ïashim bynta ha kiwei kiwei ki jingïalehkai shabar ka jylla”.
U la ong “ Kane ka Meghalaya Games kam dei kaba shu pynlut phut ïa ka pisa paidbah hynrei ka dei ka jingbei pisa na ka bynta ka lawei ki samla ha ka kam ïalehkai sport namar ka jingthrang ka long ba na kane ka jylla kin mih ki samla ban leit mihkhmat ïa ka ri India sha ka Olympics.
U Myntri Rangbah ula ong ruh “ Ka long ka burom kaba khraw ba ka President ba donburom jongka ri India ka Droupadi Murmu ka la pyllait por khnang khnang ban wan plie ïa kane ka Meghalaya Games.Baroh shitaiew la sakhi ïa ka jingkmen bad jingphuh samrkhie ha ki jaka ïalehkai naduh ka Pa Togan Nengminja Sangma Athletic Stadium, Indoor Hall Hawakhana, Don Bosco College Basketball Court bad Rongkhon Swimming Pool”.
U Myntri kam ialehkai sport u bah Shakliar Warjri u la ai ka jingïaroh ïa ki nongïalehkai kiba la sei ïa ki sap bad talen jongki ha ki jingïalehkai bapher bapher ba ki ïashim bynta. “ Ka jingïoh bad sakhi ïa ki sap bad ki phong jong ki nongïalehkai ha kane ka Meghalaya Games kaba San ka la ai mynsiem shuh shuh ïa ka sorkar ban dang ïai pynbiang ïa ki jingdonkam baroh ban nang kyntiew ïa ki kam ïalehkai sport ha ka jylla. Ka jingjop ka pynpaw ïa ka jinglong aiti lut jong ki nongialehkai bad ka pyni ruh ïaka jingïalong kawei ka mynsiem ïalehkai sport ha ka jylla. Khlem don jingartatien kin sa don ki khun samla ka jylla ki ban ïoh mihkhmat ia ka ri India ha ka jingïakhun shabar ri”.
U bah Shakliar u la ong ba ka sorkar kan ïai theh na ka bynta ban kyntiew ïa ki khun samla bad ha kine ki snem ban wan kin dang don bun ki jaka ïalehkai ki ban sa dep ban tei kum ka Indoor Stadium ha Sunny Hills, Ampati Stadium, PA Sangma Indoor Hall, Jengjal, Bajengdoba bad Williamnagar.
Ka jingtei ïa ki jaka ïalehkai sport ha kylleng ka jylla kynthup ruh ïa ki Artificial Footbal Turf, ki madan ba thung da u phlang ba im, ki jaka ïa mareh kiba la shna bha da ki Synthetic ka long ka thong jongka sorkar ban kyntiew ïa ki kam ïalehkai sport ha ka jylla.
“ Nga dap da ka jingsngewkmen ba khraw bad ai khublei kyrpang ïa u Myntri Rangbah jong ngi uba don ka jingshemphang bad ïohi jngai kum u nongïalam, ïa ki nongtrei jongka tnad Sport bad Youth Affairs bad ïa baroh ki nongshong shnong ka Tura kiba la pyni ïa ka mynsiem pdiang sngewbha ïa baroh ki nongwan ïashim bynta. Nalor kane nga ai khublei ruh ïa ki bor synshar district, ka MSOA, Sport Association kiba la ïatrei lang ban pynlong ïa kane ka jingïalehkai kaba jop. Ban pynlong ïa kum kane ka jingïalehkai ha ka sien ba nyngkong kaba jop bad phuh phieng bha kam long kaba suk bad nga ngeit skhem ruh lyngba kane kan ai mynsiem bad kan long ka nuksa ruh ïa kiwei ki district ki ban dang pynlong ïa ka Meghalaya Games ha ki snem ban wan. Nga kitbok kit rwiang ruh ïa ka Jowai ka ban pynlong ïa ka Meghalaya Games ha u snem ban wan ba kan lah ban pynlong ïa ka kaba jop”.
Na ka liang u Chief Secretary ka jylla u bah D.P Wahlang ruh u la ai jingkren ha kane ka jingpynhap lama ïa kane ka jingïalehkai.