Yn thaw ka Sorkar ïa ka Committee ban lum thup ïa ki jingïaid lynti ki 3 jaitbynriew
Shillong, Naiwieng 06: U Myntri Rangbah ka jylla u Conrad K Sangma u la pynbna ban thaw ïa ka committee kaban lum thup ïa jingïaid lynti jong ki jait bynriew Garo na Tibet bad kumjuh ruh ïa ki Khasi-Jaiñtia na Vietnam bad Cambodia
“Ngi la thaw ïa ka committee, ka ban wad bniah halor ki riewlum jong ka jylla Meghalaya bad ban buh ruh ïa ki ha ki jingthoh halor ka jingïaid lynti jong ki na Tibet na ka bynta ki Garo, Vietnam bad Cambodia na ka bynta ki Khasi bad Jaiñtia. Na ka liang ka committee ka la kynduh ban ïakren ïa ka lynti ban ïaid shakhmat bad kumjuh ruh ban shim ïa ki rai ha kaba ïadei bad kane ka kam”, ong u Sangma.
Ïa kane u la Sangma u la ong ha ka sngi plie ïa ka 49th Hundred Drums Wangala Festival kaba 3 sngi ha Wangala A’dam, Chibagre, kaba ha West Garo Hills.
Ha kane ka prokram la wan ban shim bynta da MLA ka Gambegre Mehtab Chandee Agitok Sangma, Chief Secretary Dr. Shakil Ahammed, Superintendent of Police (West Garo Hills) Abraham T. Sangma, bad kiwei kiwei.
U Myntri Rangbah u la ong ruh ba ka sorkar ka la shim bun ki lad ki lynti ban pynlong ïa ki jingwad bniah ha kaba ïadei bad ka kolshor bad ki jinghiar pateng kiba don ha jylla bad pynpaw ruh halor ka Chief Minister’s Research Grant.
Haba ai khublei ïa baroh kiba la shim bynta ha kane ka 100 drums festival, u Myntri Rangbah u la ong ba kane kadei ka jingkyrkhu ïa ka jaitbynriew bad ai khublei ruh ïa ka committee kaba la pynlong ïa kane ka Tamasa.
Ha kane ka sngi u Myntri Rangbah u la ong ruh ba ki kam khamtam ka jingshna ïa ka surok ban poi sha Wangala A’dam, la dep ban mang T. 20 klur.
“Ha ka snem ban wan kaba dei ka Golden Jubilee jong ka 100 Drums Wangala Festival ka sorkar kan ai ka jingkyrshan kaba heh bha,” ong u Conrad.
Katba u Chief Secretary u Dr. Shakil Ahammed, ha ka jingkren u la banjur ïa ka jingdonkam ban ïada ïa ka kolshor kaba dei kaba donkam bha ha kane ka por kaba mynta. U la kyntu ïa ki samla ba kin pynneh ïa la ka jong ka jingithuh bad kumjuh ruh ban pynneh ïa ka kolshor jong ka jaitbynriew.
Ïa kane ka prokram la sdang da ka jingduwai na Rev. Dilseng M. Sangma, Rev. Fr. Januarious S. Sangma bad Dr. Imnanungshi Imsong, Principal ka H.T.C, ba la pynbud da ka jingkren pdiang na u Ronald Rikman Sangma, Chairman ka Hundred Drums Wangala Festival Committee (HDWFC) bad Garo Hills Volunteers Corps (GHV).