Shillong, Jylliew 4 : Ka Awaken India Movement (AIM) Meghalaya Unit kan pynlong ïa ka jingthang mombati ha ka 6 tarik Jylliew 2022 ha Khyndai Lad naduh ka por 5 PM kum ka dak ban pynpaw ka jingsngewkhia bad sngew pyrshah halor ka jingshah pyniap dusmon ki arngut ki khyllung ba dang 4 snem bad 2 snem ka rta ha la u jong u kpa. Ka seng ka khot ka ïawer ïa ki paidbah ban ïeng pyrshah lang halor kine ki jingthombor ïa ki hok long briew man briew da kaba wan ban ïashim bynta ha katei ka jingthang mombati.
Kan long ruh kum ka dak ban ïa sngewlem bad ka long ïing bad kur Kharbuki kaba la ïa kynduh ïa kane ka jingjia ba kthang tam ha ka jingim jongki. Kane ka prokram thang mombati kan long da kaba jai jai kum ka jingpynpaw ba ym lah da lei lei ruh ban ïai shah ïa kum kine ki jingjia ba kin dang wan ïai jia ha kane ka jylla. Kane ka long kat kum ka jingpyllait khubor u Chairman kane ka AIM.
