Shillong, Naiwieng, 25: Ka kynhun “Save Hynniewtrep Mission” kaba long ka lama jong ki san tylli ki sengbhalang kiba kynthup ïa ka HYC, ka HANM, ka CoRP, ka EJNC bad ka JSM kum ka dak ban pynpaw ïa ka jingpyrshah bad pynrem halor ka jingshah siat ïap jong ki san ngut ki nongshong shnong ka shnong Mukroh, West Jaiñtia Hills District ha ki Pulit Assam ha ka step 22 tarik mynta u bnai, kin pynlong da ka jingthang ïa ki dur tyngshop jong u Myntri Rangbah ka Jylla Meghalaya u Conrad K. Sangma, u Myntri Rangbah ka Jylla Assam u Himanta Biswa Sarma, u Myntri ka tnat Kam Pohing ka Sorkar India u Amit Shah.
Katkum u kyrwoh ba la phah da u General Secretary ka HYC u Bah Roy Kupar Synrem u la ong ba ka jingthang ïa ki dur tyngshop kan long lashai ka sngi Saitjaiñ ha nongbah Shillong ha ka por 2:00 baje nohphai sngi.
Ki mat jingdawa jong ka Save Hynñiewtrep Mission ki long ba ka Sorkar Meghalaya ka dei ban kem mardor ïa ki Pulit bad ki Forest Guards ka Jylla kiba donkti ban siat ïap ïa ki san ngut ki nongshong shnong jong ka shnong Mukorh bad ïa ka mukotduma bad ka jingbishar dei ban leh hapoh ki Kashari jong ka Jylla Meghalaya ym sha Assam.
