Shillong, Risaw 13: U Myntri Rangbah ka jylla u Conrad Sangma u la pynpaw ka jingsngewsih kaba khraw ban tip ïa ka khubor halor ka jingkhladnoh jong u Brother Eric Steve D’Souza ha ka sngi u Blei.
Haba thoh ha ka rynsan X, u Conrad u la ong, “da ka jingsngewsih kaba khraw, nga la ïoh ka jingtip halor ka jingkhlad noh jong u Brother Eric Steve D’Souza, uba long ruh u nongsaiñ dur ha ka pule puthi bad kumjuh ruh uba aiti met bad mynsiem ban kyntiew ïa ka kam pule ha ka jylla. Kum u dkhot jong ka jingïasyllok Christian Brothers, u Br. D’Souza u la pynlut bun ki snem ha St. Edmund’s School, Shillong, ha kaba kane ka la ieh ka jingsah kynmaw halor ki kam ba ratbah ba u la leh. Kum u riewniam ka jingïasyllok Christian Brother ba la aiti met bad mynsiem ban shakri ïa ki paidbah ha ka pule puthi, u la don ruh ka mynsiem ban seng ïa ka Providence School, kaba dei kaba la wanrah ka jingkyrmen ïa ki khynnah pule kiba wan na ki longïing kiba tlot ka ïoh ka kot. Ai ba ki kam ba la ai mynsiem jong u Br. D’Souza kan wanrah ka jingtngen ïa ka ïing ka sem jong u, ïa ka jingïasyllok ki riewniam Christian Brothers bad ki jingim ki bym lah shuh ban ñiew kiba u la wanrah ki jingkylla lyngba ka pule puthi bad ai ba ka mynsiem jong u kan ïoh ka jingjahthait ka bymjukut.”
Kum ban pynkynmaw hangne, u Myntri Rangbah ka jylla u Conrad K. Sangma u la pule ha St. Edmund’s Higher Secondary School, Shillong ha shwa ba un leit pule noh sha St. Columba’s School, New Delhi. U Br. D’Souza u la long uwei na ki nonghikai uba la hikai ïa u Myntri Rangbah ka jylla ha St. Edmund’s School, Shillong.
Ka jingpynbna halor ka jingkhlad noh u Brother D’Souza la pyntip da u Brother Solomon Morris, uba dei mynta u Principal ka St. Edmund’s School, Shillong ha ka nohphaisngi ka sngi U Blei.
Katkum ka jingïathuh u Brother Morris, u Br. D’Souza u la khladnoh ha kane ka step ha Regina Mundi, Goa. Ka jingkhlad noh ka dei jingban ka jingpang kaba la slem bha.
U Brother Morris u la ïathuh ruh ba ïa ka met basah jong u Br. D’Souza yn sa wanrah sha Shillong na ka bynta ban pynlong ka jingleh burom kaba khatduh.
Ka met basah jong u kan lah ban poi ha ka sngi Baar bad ka jingleit ontep kan long ha ka sngi Balang bad ïa ki jingtip ba bniah yn sa nang pyntip shuh shuh kham hadien.
