Shillong, Jylliew 24: Ka Nongmensong Dorbar Secondary School shen kan sa ïoh ban sakhi ïa ka jingsdang ban tei noh ïa ka ïing skul na ka bynta ka kyrdan jingpule Secondary kata hadien 24 snem ka jingïaid lynti kane ka skul ban ai jingshakri ïa ki khynnah pule khamtam kiba wan na ki longïing kiba kham duna ka ïoh ka kot.
ïa kane la pynurlong da kaba plie ïa u mawnongrim kum ka dak ban ïaid sha khmat noh ïa ka jingtei ha ka step 24 tarik u Jylliew, 2022 da u Bah AL Hek, MLA ka Pynthorumkhrah ha ka jingïadonlang u Bah Fantin J Lakadong, MDC ka Malki-Laitumkrah, ka Kong MS Kshir, BDO Mawpat C&RD Block, u Bah Phrang Warjri, Rangbah Shnong, u Bah B Khonglah, Rangbah Shnong barim, ka Kong Swilin Kharsahnoh, Headmistress nalor kiwei kiwei pat.
ïa ka mang tyngka na ka bynta ban tei ïa kane ka ïing skul na ka bynta ka kyrdan jingpule Class IX bad Class X la bei da u Bah AL Hek na ka skhim MLA jong u kaba long 10 lak. Kumjuh ruh na ka bynta ban pynbit pynbiang shuh shuh ïa kane ka skul na ka liang u MDC Bah Fantin J Lakadong ruh u la kular ban ai jingïarap na ka skhim MDC.
Kane ka skul ka la ïoh jingithuh kum ka skul Secondary ha u snem 2015.
Ha ka bynta kaba ar jong ka jingïalang ha kane ka sngi, ka skul ka la pynkup burom ruh ïa u Bah B Khonglah, Rangbah Shnong barim ka Nongmensong uba la bat ruh ïa ka kam kum u President ka School Managing Committee kane ka skul naduh u snem 1998 haduh u snem 2021.
Ka jingpynkup-burom ïa u Bah Khonglah ka long na ka bynta u synñiang ba u la noh sha kane ka skul ha ki bynta bapher bapher ym tang kum u President hynrei kum u riewrangbah uba la wad ki lad ki lynti ban pynlong ïa kane ka skul kumba ka long mynta.
