Yn tei ka Sorkar ïa ki Cinema Hall ha manla ki District ban kyntiew ïa ki karkhana pynmih Phlim

Shillong, Naitung, 23: Khnang ban kyntiew ïa ki karkhana pynmih phlim ha ka jylla u Myntri Rangbah u Conrad K Sangma myn ha ka Sngi Thohdieng u la ong ba ka sorkar kan tei da ki cinema hall ha man la ki district bad ka thong ka long ban pyndep ha man la ki district hapoh kane ka samoi san snem.
U la pynpaw ïa kane haba kren haka por ba pyllait ïa ka phlim “ Rapture” ba la pynmih da u Dominic Sangma bad kaba la rung ruh ban shah bishar bniah ha ka film festival ka ban long ha Switzerland.
“Ngi kitbok bad kyrmen ba kane ka phim jongu Dominic kan jop ha ka kyrdan ban bishar bniah ïa ka bad na ka liang ka sorkar ka kloi ban ai kano kano ka jingïarap lada donkam ha kano kano ka por” ong u Myntri Rangbah.
Haba pynpaw ba u Dominic un long uwei u nongai mynsiem ïa kiwei ki para nongthaw phlim ha ka jylla , u Myntri Rangbah u la ong “ Lada ki briew kum u Dominic ki ïoh jingithuh hakhmat ka pyrthei namar ka jingtrei shitom nga ai mynsiem ïa kiwei ki nongthaw phlim ruh ba kin bud ïa kane ka nuksa”.
U la ïathuh ba ka sorkar mynta ka dang pynkhreh ïa ka polisi ban kyntiew ïa ki phlim ha ka jylla, u la ong shuh shuh “ Nga la dep pynbna ha ka mang tyngka ba ngin ai jingïarap ïa ki nongpynmih phlim na ka jylla khnang ba kin lah ban pynmih ïa ki phlim kiba itynnad bad lada ki donkam da ki kor ki bor ruh ngin thaw lad ban ïarap ïa ki”.
Nalor kata ngi la rai ruh ba ïa ki phlim festival yn ïai pynlong ha kane ka jylla khnang ba kan long kum ka jingai mynsiem bad pynshlur ïa ki nongthaw phlim na ka jylla ba kin tip bniah bha namar kane ka karkhana phlim ha kane ka jylla ruh ka dang biang bha wat lada ngim pat lah ban da sngewthuh haduh katno kan ïarap ban ai kam ai jam ïa ki khun samla, ong u Myntri Rangbah.