Shillong, Risaw 24: U Myntri ka sorkar jylla uba khmih ïa ka tnat Arts and Culture u Bah Sanbor Shullai u la pynbna ïa ka jingpyrkhat ban pynïeng biang ïa u dur mot ba shi rynïeng jong u Tirot Sing Syiem, u nongïakhun bad nongïaleh laitluid, ha Dhaka, ri Bangladesh.
Haba kren sha ki lad pathai khubor ha ka sngi Thohdieng, u Bah Shullai u la pynpaw ba u don jingthmu ban ïasyllok bad phylliew jingmut ïa kane ka kam bad ka Indian Embassy kaba ha ri Bangladesh ban bishar ïa ka jinglong jingman bad ban shim ïa ka sienjam ban leh na ka bynta kane ka jingthmu.
“Ngin sa ïapeit bad nga hap ban ïasyllok bad ka Indian Embassy kaba don ha ri Bangladesh,” u la ong.
U Myntri u la pynpaw ka jingsngewsih halor ka jingjia ba dangshen halor ka jingshah pynpra u mot Tirot Sing da ki paidbhur ha Dhaka. Katkum ka jingïathuh jong u, ka jingpynïeng ïa u dur mot ka dei ka kam kaba u la sdang ma u ha ka por ba u danglong u Myntri ka tnat arts & culture hapoh ka sorkar MDA-I.
U la pynrem ïa kane ka jingleh da kaba kdew ruh ba kim shym la ailad ne pynsah wat ïa u dur mot jong u Kpa ka Ri ba la pynïeng ha ri Bangladesh.
U Myntri u la pyntip ba u la dep ban ïakren ïa kane ka kam bad u Commissioner & Secretary u Bah F Kharkongor bad u dang pyrkhat ba dalade shimet un sa leit ban jngoh ïa ka jaka khnang ban khmih ïa ka jingdonkam ban shna biang ïa u dur mot ba shi rynïeng jong u Tirot Sing.
“Ngin sa pynbeit ïa ka por bad ngan sa leit dalade ban peit ïa ka jaka namar ngi hap ban tei biang ïa u dur mot ba shi rynïeng jong une u riew ïaleh laitluid ka ri,” u la ong da kaba banjur ba u dur mot ba thymmai un dei uba shi rynïeng ym tang uba shiteng.
