New Delhi, Jylliew 18: U Myntri Rangbahduh ka ri u Narendra Modi un sa plie paidbah da kaba tbeh ïa ka sharak kaban sah jingkynmaw ïa ka lympung ïalehkai 44th Chess Olympiad ha ka 19 tarik Jylliew ha ka por 5 baje janmiet ha Indira Gandhi Stadium, Delhi. Ha katei kajuh ka sngi u Myntri Rangbah duh un ai ruh ka jingkren.
Ïa ka sharak yn sa aiti da u President ka FIDE u Arkady Dvorkovich ha ki kti u Myntri Rangbah duh, uban sa aiti pat ha ki kti jong u Grandmaster Viswanathan Anand.
Ïa katei ka sharak yn sa rah pat kylleng ha ki 75 tyli ki nongbah hapoh ki 40 sngi shwa ban poi ka final kaban sa long ha Mahabalipuram hajan Chennai. Ha manla ki nongbah, ki Grandmasters ka ïalehkai chess kin sa pdiang ïa katei ka sharak.
Mynta u snem, ha ka sien kaba nyngkong eh, ka synjuk pynïaid ïalehkai chess ba hakhlieh duh ka FIDE ka la shim ka sienjam ban tbeh sharak ïa katei ka jingïalehkai shi bynta ka jingïalehkai kaba ju tbeh sharak ha ka Olympics hynrei kam pat ju leh na bynta ka Chess Olympiad.
Ka India kan dei ka ri kaba nyngkong tam ban ïoh pynlong ïa ka Chess Olympiad Torch Relay.
Kaba kham kyrpang ka long ba ka India kaba la ïakhun mynta ban long ka ri kaba hakhmat eh ha ka ïalehkai chess, katei ka sharak kan sdang na India shwa ba kan poi sa sha kiwei pat ki ri jong ka pyrthei kiban sa ïoh ban pynlong ïa katei ka jait jingïalehkai chess.
Ka 44th Chess Olympiad kan sa long ha Chennai naduh ka 28 tarik Naitung haduh 10 tarik Nailar 2022. Kin don haduh 189 tylli ki ri ka pyrthei kiban ïashim bynta bad kadei kaba nyngkong tam ban don bun kiba ïashim bynta ha katei ka Chess Olympiad.
