Nongstoiñ, Naitung 11: Ka seng HNYM hapoh ka jingïalam jong u samla Tailanstar Lyngkhoi President HNYM WKHD, ha ka sngi saitjaiñ ka la leit ban ai mynsiem ïa ka longïing jong u heprit u ba la duh ei wat ïa ka jinglong shynrang jong u, namar ka jingshah bat ha ka elektrik dang myn ha kine ki sngi kiba dang shu dep. Utei u heprit u dei u khun jong I kong Banisha Kurbah na ka shnong Umwiehsup Mairang EWKHD.
Ha katei ka sngi, la ïadonlang ruh u bah Kmendar Tympuiñ nongaibuit ka HNYM Nongstoiñ Pyllun bad u samla Jana Dkhar Joint Secretary HNYM WKHD. Katba na ka liang u rangbah shnong bad u secretary jong katei ka shnong, ki la pynpaw ruh ïa ka jingsngewnguh ïa ka seng, da kaba ong, “Ngi da sngewnguh eh ïa kitei ki samla kiba la leit ban ai ka jingsngew lem, kum ka dak jong ka jingkyrshan ïa katei ka ïing kaba long ruh ka ïing ka riew kynthei”.
Hadien nangtei, ka seng ka la leit ruh ban ai ka jingsngewlem sa ïa ka ïing jong I kong Ediltredis Nongsiej bad u bah Krik Musulman kiba don ïa u khun ksiew u ba la ïoh ïa ka jingpang kaba khyllah, kiba shong ba sah ha ka shnong Sohpian Nongstoiñ. La ong ba namar ba katei ka longïing ka dei ka longïing kiba duna ha ka ïoh ka kot, kumta na ka liang jong u bah Donbaklang Marweiñ Assistant Organising Secretary HNYM WKHD, u ba dei ruh uwei na ki nongai dawai kynbat Khasi u ba la pawbha ha ka thaiñ, u la shim ïa ka jingkit khlieh ban ai jingsumar ei ïa utei u heprit, khlem da donkam jinglut bad naduh katei hi ka sngi u la pyrshang ban ïalam sha ka jaka ai jingsumar jong u ban leh ïa kaba donkam.
Kumban shu pynkynmaw ba kitei ki 2 tylli ki longïing ki kynthup ïa u heprit u ba la kum rung ha ka jaka buh ïa ki mashin bording bad ka elektrik kaba khlaiñ bor, ka la bat ïa utei u heprit kat haduh ba u la mynsaw jur bad u la duh noh ruh wat ïa ka jinglong shynrang. Hynrei uwei pat u heprit u dei u ba la ïoh ïa ka jingpang kaba khyllah, kat haduh ba ka la at lut ka met ka phad, kat haduh ba la I shyrkhei ïa ka jingat jong ka kpoh kaba la I kum ban sa bthei.
