Yn shongshit ka Dorbar ba khatduh ha KHADC, shikhung ki ishu pynap ka Liang Pyrshah ïa ka EC ban jubab

Shillong, Nohprah 18 : Ka Dorbar Tlang ba khatduh jong ka KHADC mynta ka samoi kaban sdang naduh mynta ka sngi Palei, ka 19 tarik kan shongshit bha khamtam haba ka jingdon ki dkhot ha ka Liang Pyrshah ka la bun bad khlaiñ bha da ka jingwan lang sa lai ngut ki MDC jong ka Congress.
Kumba long mynta, ka jingkhlaiñ jong ka Liang Pyrshah ka long 9ngut ha ka Iing kaba don 28 ngut, kata hadien ka jingkhlad noh jong ki arngut ki CEM barim ba kynthup ïa u Bah Teinwell Dkhar bad Bah Latiplang Kharkongor.
Na ka liang u Nongïalam ka Lïang Pyrshah, Bah Titos W Chyne u la ïathuh ba kum ka kynhun ki la pynkhreh bun bha ki ishu kiba ïadei bad ka rukom treikam jong ka bor synshar nalor bun kiwei kiwei ki mat. “Ngi la pynkhreh ki ishu kum halor ka Forest Department, nangta halor ka Solid Waste Management bad bun kiwei kiwei,” ong u Bah Titos haba kren bad u Mawphor.
Haba jubab halor ka jingkylli halor ka jingwan jong ka Congress sha ka Liang Pyrshah, u Bah Titos u ong ba ki khmih lynti ba kin leh shisha kum kita kiba don ha ka Liang Pyrshah.
“Shisien ba ki la wan lang sha ka Liang Pyrshah ngi khmih lynti ba kin leh kum ka Liang Pyrshah,” ong u Nongïalam ka Liang Pyrshah.
Lah ban kdew hangne ba ki lai ngut ki MDC ka Congress ba kynthup ïa u Deputy CEM Bah PN Syiem, nangta u EM ka tnad Arts and Culture Bah Victor Ranee bad kumjuh u Bah Ronnie V Lyngdoh ki la weng noh ïa ka jingïatrei lang bad ka NPP ha ka Executive Committee halor ka nongrim ba ka don ka jingpynbor na ki nongïalam ka party ban pynkut noh ïa ka jingïatrei lang ha ka EC ba ïalam da ka NPP.
Ha kawei pat ka liang lah ban ong ruh ba kane kadei ka Dorbar kaba khatduh na ka bynta kiba bun ki MDC kiban ym aireng shuh ha kane ka elekshon MDC kaban sa long ha ka 21tarik Rymphang 2025.
Dang shen, la ïohi ba ki don bun bha ki MDC kiba la rai ban ym aireng shuh bad ailad noh ïa kiwei pat ki kyrtong kiba ki party jong ki, ki la dep ban jied ban pynieng.