Shillong, Rymphang 2 : U Myntri ka Koit ka Khiah u Ma Wailadmiki Shylla ha ka sngi Nyngkong, ula pyntip ba un sa pynlong ïa ka jingïalang bishar kam ha ka ban pynbeit ïa ka kam ba ïadei bad ka jingshna ïa ka Sub-Centre ha ka shnong Hingaria, kaba don ha khappud bad ka Bangladesh.
Kane kala mih hadien ba ki nongïalam ka Shnong Hingaria, ki la ïakynduh ïa u bad kyrpad ïa ka Sorkar ba kan mynjur ha kaban shna ïa ka Sub Health Centre ha ka shnong.
Haba ïakren bad ki nongthoh khubor, u Ma Wailad ula ong ba ka Sorkar ka la thmu ban tei ïa ka Sub-Centre ha Hingaria hynrei hadien la pynkynriah noh has Mynkre namar ka jingbym lah ban leh bad ka jingbym biang ha ka jingdon paid kat kum ki kyndon.
“Ka jaka kam ïahap satia bad ka jingdon paid ruh ka long hapoh 3000, bad ka Huroi Sub-Centre, kaba jngai tang 3 Km, kaba la khmih lang ïa ka jingdonkam jong ka Hingaria” batai u Ma Wailad.
Hynrei, haba pyrkhat ïa ka jingdon ka Hingaria sha kyndong eh bad ba ïajan bad ka Bangladesh, u Ma Wailad ula kular ban sa shong ïa ka jingïalang bishar kam ban peit ïa kaei kaba lah ban leh.
“Ngin pyrshang ban wad ïa ka lynti kaba ïabeit lang, hynrei ngi hap ban bud ïa ki kyndon ban seng ïa ka sub centre” ula bynrap.
Ha ka dorkhas, ka Dorbar Shnong kala pynpaw ba kat kum ka jubab RTI bala ïoh na u District Medical & Health Officer ka East Jaintia Hills, ka Tnad ka la dep leh ïa ka sorjamin, hynrei ïa ka skhim la rah noh shawei da kaba pynpaw ïa ka jingbym pat biang ka jaka. Hynrei, ka Dorbar Shnong ka la kam ba ka khlem ïoh ktien eiei halor kane bad ka kloi ban ai jaka na ka bynta ka centre.
Ka la pynpaw ba ka shnong ka la sakhi ïa ka jingjur ka jingiap ki longkmie ba kha khun, ka jingduna ka jingïoh injek ïa ki jingpang bad ka jingma lada pang namar ba slem ban ïoh ïa ka jingsumar.
“Ngim lah shuh ban shu peitkai ïa ki Longkmie ba pun khun, ki khunlung ba dang kha bad ki nongpang ba shitom jur ba kin duh ei ïa la ka jingim haba pynkit ïa ki sha ki hospital kiba jngai” ong ka Dorbar Shnong.
Shuwa kane, ka MLA Kong Santa Mary Shylla ka la kren ïa kane ka kam hapoh ka ïing Dorbar Thaw Aiñ ka Jylla.
