Shillong, Nailur 09: Ka sorkar jylla ka la pynbna ba kan shna noh ïa ka Eastern Bypass na Sohryngkham sha Mawshbuit bad Mawlynrei, ha kaba kane kan ïarap ban pynduna ïa ka jingdheng kali hapoh ka nongbah Shillong. Kane ka surok kaba 9.95 km kan ïarap ruh ïa ki kali kiba wanrah ïa ki marbam bad ki tiar khaïi ba kin lah ban lait ban ïaid na Nongbah Shillong.
Haba jubab ïa ka jingkylli ba la wanrah da u MLA ka VPP na Mawryngkneng u Bah Heavingstone Kharpran u Symbud Myntri Rangbah uba khmih ruh ïa ka tnat PWD (Roads) u Bah Prestone Tynsong u la ïathuh ba kane ka project kadei ruh shi bynta ban ïarap ïa ka jingeh ha kaba ïadei bad ka surok na Mawshbuit sha Happy Valley.
La ïathuh ruh ba ka 58 Gorkha Training Centre (GTC) ka la pynïeng da ka khyrdop ha kane ka surok kaba la wanrah ka jingeh ïa ki nongshong shnong ka Mawshbuit.
U Bah Tynsong u la ïathuh ruh ba ka sorkar ka la ïoh ïa ka jingtyrwa jaka na ki bor pynïaid shnong na ka bynta ban shna da kawei pat ka surok.
“Ngi la shim ïa ka jingjurip bad ka jingjngai na Mawshbuit sha Mawlynrei ka long 4km. Kumba 300 meter jong kane ka surok ka hap hapoh ka jaka jong ki shipai,” u la ong.
“Nga ka kyrpad ïa u MLA na Mawryngkneng ban ïa don bynta lang ha kane ka kam. Sa shisien na Sohryngkham sha Mawshbuit lada ngi ïoh ka jaka bad na Mawshbuit sha Mawlynrei ïa kane yn khot da ka Eastern Bypass,” ïathuh u Bah Tynsong.
Ha kaba ïadei bad ka surok 600-meter na Mawshbuit sha Happy Valley, kaba hap hapoh ka jingpeit jong ka tnat shipai na ka liang ka sorkar kan sa ïakren bad ki shipai ban maramot ïa ka surok kaba la sniew.
