Yn shim kylliang ka sorkar da ka buit ka sorkar Assam ban tei ïa ki jaka pule doktor ha ka jylla

Shillong, Jylliew 19: Ka sorkar jylla ka la rai ban shim kylliang da ka buit ka jylla Assam ne Assam-model na nynta ban tei ïa ki jaka pule doktor ha ka jylla.
Ka Myntri ka Koit ka khiah ka sorkar jylla ka Kong Ampareen Lyngdoh ha ka jingïakren bad ki lad pathai khubor ka la ïathuh ba dang shen ka la ïoh ban shong phylliew jingmut bad u Myntri Rangbah ka Assam u Himanta Biswa Sarma ha kaba ïadei bad ka buit ba ka pyndonkam na bynta ban tei ïa ki jaka pule doktor ha Assam.
Ka la ïathuh ba ka Assam ka pyndonkam da ki jaka sumar ha man ki district ban kyntiew kyrdan sha ki jaka pule doktor namar kiba bun ki kyndon kiba la buh na bynta ban seng jaka pule doktor ki la biang pura.
“Ngi kyrmen ba ka jylla jong ngi ruh kan lah ban ïaid da kajuh ka lynti kumba leh ka Assam. Kane kan shim por ban pynkhreh hynrei kam mut pat ba ngim lah ban pyntreikam ïa kane ka buit bad ngi kyrmen ba shen ngin sa ïoh ïa ka state-of-the-art medical colleges,” ka la ong.
Haba ïadei bad ka jingtei ïa ka Shillong Medical College, ka myntri ka la ïathuh ba shen kan sa rah ïa kane ha ka jingïalang ka kynhun myntri.
Ka la ïathuh ba kum ba long mynta ki don ar tylli ki lynti na bynta ka jaka pule doktor ha Shillong la kan dei da ka PPP model ne la ban pyndonkam da ki jingïatreilang bad ki jaka sumar kiba don ha ka jylla kum ka Shillong Civil Hospital, Ganesh Das hospital, ka Reid Chest hospital bad ka ong ba lada leh em ban pynkylla ïa kine ki jaka sumar sha ka jaka pule.
Haba ïadei bad ka Tura Medical College ka myntri ka la ïathuh ba ka jingpyntrei ka ïaid shakhmat.
“Shen ngan sa leit jurip sha Tura ban pynthikna ba ka jingtrei kan ïaid shakhmat bad tsng hu dep ban tei ïa ki jingdonkam ngam artatien ba ka jingplie noh ïa kane ka jaka pule doktor kan dang shimpor,” ka la ong.