Shillong, Lber 26: U Myntri ka sorkar jylla bad u nongai ktien ka sorkar u Bah Paul Lyngdoh ha ka sngi Balang u la pynthikna ba ka sorkar kan sa shim kam lada don ki jingujor ba leit ki khynnah na ka jylla sha kiwei pat ki jylla.
Ïa kane u la jubab ïa ka jingkylli halor ka jingdawa ban wad ïa ki jingshisha da ka state fact finding team ha kaba ïadei bad ka jingdon ki khynnah shynrang bad kynthei kiba la shah ïalam ha ki kynhun ne ki seng ban pynïoh ïa ka jingpule kaba ym donkam ban siew shabar ka jylla khamtam kaba ïadei bad ka jingjia ngat bih ki khynnah kaba la jia ha jylla Karnataka, kaba la shim ïa ka jingim jong ki 2 ngut ki khynnah na Meghalaya.
Haba kren sha ki lad pathai khubor u Bah Lyngdoh u la ong, “Ka sorkar ka ïeng na ka bynta ban ai ki lad jingïada jong baroh ki nong Meghalaya, kiba leit bad kiba pule shabar ka jylla bad dei halor kane ba u commissioner & secretary home da lade u la leit ban jngoh ïa ki jaka sumar kaba dei ruh na ka liang jong ka sorkar jylla bad shim ki jingkheiñ ha kaba ïadei bad kane ka jingjia bad kumjuh ruh ban ïarap ïa kito ki arngut ki khynnah kiba la khlad halor ka jingsuba ngat bih ha ka bam.”
“Na ka liang ka sorkar kan leh katba lah ïa ki kam ban sei madan halor ka jingkhlad noh jong kine ki arngut ki khynnah. U secretary home un sa aiti ïa ka kaiphod sha u deputy CM ba khmih ïa ka tnat ki Kam Pohïing bad sha u Myntri Rangbah bad ngin sa leh ïa kaba donkam ha kaba ïadei bad kane ka bynta,” u la bynrap.
U Myntri u la kyrpad ruh ïa baroh ki nongshong shnong bad khamtam ki nongïalam shnong ba kin wanrah ïa kine ki jingjia sha ka jingtip jong ka sorkar bad kumjuh ruh sha ka tnat social welfare khnang ban lah ban shim kam ha kaba ïadei bad ki jingujor.
“Ngi donkam ban ïoh ki jingujor naba ki donkam ruh ki jingmynjur na ki kmie ki kpa, ki ba haïing hasem ha kaba ka sorkar ka don ka bynta kaba rit hynrei lada ka don ka jingujor ba don ki khynnah kiba la shah thombor la ka dei ha ka kam pynkylla niam ngin sa leh ïa kaba donkam haba ïadei bad kine ki jingujor. Namar kata ngi donkam ka jingpyntip kaba shai bha halor kane ka bynta,” u la bynrap.
