Yn shah pynshitom hapoh ka 163 BNSS ïa kiba bret jaboh pathar ha ki wah bad surok: DM EKH

Shillong, Jylliew 12: Katba iba soi kyrteng harum i la ïoh jingtip ba katkum ka kaiphod jong ka jingjurip ba la pynlong da ka Meghalaya State Pollution Control Board halor ka jinglong ka Wah Umkhrah bad Wah Umshyrpi ha kaba la pynpaw ba kam don ka jingkiew ha ka jingkhuid jong ka um, khamtam ha Wah Umshyrpi hajan Law College, ha Jingkieng Umshyrpi. Ka Umkhrah ha Demthring, Umkhrah ha Umkaliar, Umkhrah hajan ïing Shohdoh (Mawlai Phudmuri) bad Umkhrah ha Mawpdang Mawlai.
Katba, namar ka jingbun ki jingbuh kyndon, kata, ka Biological Oxygen Demand & Faecal Coliform, ka jingpyntuid beaiñ ïa ki jakhlia na ki septic tank sha ki um bad ka jingkawang/bret ïa ki ñiut sha ki surok/um, kaba pynjakhlia ïa ka um kat haduh bym long shuh ban pyndonkam ha ïing bad ktah ïa ki dohum ruh kumjuh.
Namar, kum kine ki jingleh ym tang ba ki wanrah ïa ka jingjakhlia ïa ka Lyer bad ïa ka Um hynrei ki buh jingma ruh ïa ka koit ka khiah jong ki nongshong shnong kane ka Distrik. Namarkata, ka Kong R. M. Kurbah, IAS, District Magistrate, East Khasi Hills District, Shillong, lyngba ka bor kaba la pynkup ha ka hapoh ka Kyndon 163 BNSS, ka la buh ka jingmana ïa ka jingpyntuid beaiñ ïa ki jaboh bad kiwei ki jakhlia na ki septic tank, ki karkhana kali, jaka ïadie ïathied, bad kiwei bad ka jingkawang/bret ïa ki ñiut sha ki surok/um ha kitei ki jaka ba la kdew haneng.
Kino kino kiba pynkheiñ ïa kane ka hukum kin ngat ha ka jingshah pynshitom hapoh ka Kyndon 223 jong ka BNS bad shim ki lad ka aiñ katkum ki kyndon jong ka Water (Prevention and Control of Pollution) Act. 1974 bad ka Air (Pevention and Control of Pollution) Act, 1981. Namar ka jingkyrkieh jong ka kam, ïa kane ka hukum la pynmih da ka ophis bad kan treikam noh mardor naduh ba la soi bad shon muhor ha ka 13 tarik Jymmang, mynta u snem, ong ka kyrwoh khubor ba la phah da ka kong R.M. Kurbah, 1AS, District Magistrate, East Khasi Hills District, Shillong.