Yn seng ka NIT Meghalaya ïa ka Strucural Engineering bad Health Monitoring Center : Director

Shillong, Iaiong 1 : Ka National Institute of Technology (NIT) Meghalaya kaba la pynkynriah mynta sha ka Permanent Campus ha Saitsohpen, Sohra shen kan sa seng nongrim ïa ki ar tylli ki tnad pule bad wad bniah ba thymmai kata ka Structural Engineering bad ka Health Monitoring Center, ïathuh u Director ka NIT U Pinakeswar Mahanta ha ka jingïakren bad ki nongthoh khubor hadien ba la wai ka jingrakhe ïa ka Foundation Day ne ka Sngi ba la Seng Nongrim ïa ka NIT ha Meghalaya.
ïa kane ka rai la shim hadien ka jingïamir jingmut bad khamtam eh hadien ka jingai jingmut jong u Prof Amitav Ghosh, Platinum Jubilee Senior Scientist of National Academy of Sciences , India.
U Director u la kdew ïa ka jingdonkam ban wad bniah bad ai jingmut ha kaba ïadei bad ka rukom tei ïa ki jingtei khamtam eh hangne ha ka thaiñ shatei lam mihngi ka ri India. “ Kat haduh mynta ngi shu ai jingmut bad aibuit ha kaba ïadei ba ka rukom tei ïa kino kino ki projek ha kane ka thaiñ hynrei mynta ngi dei ban don ka Center ban wad bniah bha khnang ba ki samla pule ruh kin ïoh ban ïashim bynta lang” ong u Director.
Ka jingrakhe ïa ka Foundation Day jongka NIT mynta u snem ka kham long kyrpang ym tangba ka long ka sien ba nyngkong ba la pynlong ha Permanent Campus Sohra, hynrei khamtam da ka jingwan ïashim bynta lang ki lai ngut ki Professor na ka Hamburgh University of Technology bad na ka Hamburgh University, Germany. ïa ka NIT la pynkynriah noh sha Sohra naduh u Rymphang mynta u snem bad ka jingeh jongka jaka jongka ka long haduh 320 acre.
Na ka liang u Director u la ïathuh ba ka jingpynkynriah ka la sdang naduh u Jymmang jong u snem ba la dep ha kaba la sdang shwa ban pynkynriah ïa ki tiar ki tar jong ki Laboratory, hadien kane la pyndep sa ka hostel jong ki samla pule bad ki Nonghikai. “ Hooid namar ba ka jingtei ruh ka dang ïaid shakhmat ngi ïa mad hi ki jingeh ban pynbiang ïa ki jaka sah hynrei da ka jingïatrei lang ki nongtrei bad ki Nonghikai la lah ban pynkynriah suki pa suki bad mynta la dep ban pynkynriah lut nadong shadong na Shillong sha Sohra. Kumba long mynta kumba 80% ka kam la dep trei bad kaba sah ka long sa tang khyndiat bad yn ïaleh ban pyndep hapoh lai lane saw bnai ban wan” ong biang u Director.
Ban seng ïaka Structural Engineering bad ïa ka Health Monitor Center donkam ban ïoh jingmang pisa bad halor kane la rai ban kyrpad ïa ka tnad pule puthi ka sorkar pdeng bad sorkar jylla ban ïarap ïa ka NIT khnang ba kan long ka jingmyntoi ïa ki samla pule hi. Ban sdang ha ka juh ka por ruh ka long kaba eh bad kumta ngin sdang da ka wat ba nyngkong bad bud sa kaba ar bad ba lai ter ter bad yn pyrshang ban sdang noh shwa hapoh kine ki ar lane lai bnai ban wan.
Halor kane ka jingrakhe la pynphuh pynphieng bad pynshong kun da ki prokram bapher bapher khamtam na ka jingkren bad batai jong u kongsan u Amitav Ghosh halor ka “ Astronomical Dating of Ancient Indian Scriptures and Epics – Building a Science-Based Timeline for Ancient India”. Sa uwei pat u nongkren ba paw u dei u Prof. Rakesh Sehgal (HAG) NIT Hamirpur uba ai jingkren halor ka jingsdang ka jingseng kam seng jam bad ka jingwad bniah ïa ki kam ba thymmai.
Ki lai ngut ki Professor kiba la wan na ka Hamburgh University ki dei ka Wang Yi, Nicole Feri kiba dei na ka Hamburgh Univeristy of Technology bad ka Antje Katzshner na ka University of Hamburgh. Kine ki la ïamir jingmut halor ka jingdonkam ban ïatrei lang ha ki kam wad bniah bad kumjuh ruh ban ïadon bynta ki samla pule ha ki prokram bapher bapher jongka University ha Germany bad ka NIT ha Sohra.
Halor ki jingujor ba dang shen ba ka jia ka jingpei um ha ki kamra, u Direcotor u la ïathuh ka daw ka dei namar ba wan kynsan u lapbah bad u phria bad ki don ki jaka kiba ym pat dep ban buh ïa ki pipe kumta ka um ka la rung shapoh ki kynroh bad wat ka quarter jongu ruh ka shlei um ha katei ka sngi. Hynrei ïa kine la lah ban pynbeit noh mar mar da ka jingphah trei kloi ïa ki misteri bad mynta ym lei lei ruh. Halor ka jingshah beh ki nongbylla u la ong ka long kaba shisha ba kim don kot don sla bad mynta la bthah ba ki dei ban pynbiang ïa ki kot ki sla bad ki kontraktor ruh ki dei ban peit ba ki nongbylla ki dei ban biang ki kot ki sla khnang ba ynda la sdang trei biang yn ym don shuh kano kano ka jingpynthut jingpynwit .