Nongstoiñ, Risaw 18: U Deputy Commissioner (Election) jong ka West Khasi Hills, u la pyntip ïa ki paid nongshong shnong ka District ba katkum ka jingbthah jong ka Election Commission jong ka Ri India, kan don ka jingpynrung kyrteng thymmai biang ïa ki nongthep Vote kiba la dap 18 snem ka karta kat haduh ka 01.01.2025.
Ha kaba ïadei bad kane ka kam, la thung kyrpang ïa ki briew Sorkar (Booth Level Officers) ki ban wan ha ki shnong kata ha ki Polling Station ne jaka thep vote naduh ka 29 tarik u Risaw 2024 haduh ka 28 tarik u Naiwieng 2024.
Lada don kino kino ki jingbakla lane jah kyrteng ruh ha ka Photo Electoral Roll lah ban leit ujor ha kitei ki sngi bad por ba la kdew haneng. Ïa ka Photo Electoral Roll ba la dep pynkhreh lah ban leit peit ha ki Polling Station ha kitei ki tarik.
Kumta la kyrpad ïa ki nongïalam shnong ban ai ka jingpyntip paidbah ha ki shnong ki thaw jong ki, ban pynrung kyrteng thymmai ha ka Electoral Roll kiba la dap 18 snem ka karta kat haduh ka 1 tarik u Kyllalyngkot 2025 bad ban pynbiang lypa ïa kine ki kot jingpynshisha kum ka birth certificate, school certificate, baptismal certificate, ID Card, Driving license, ar tylli ki passport size bad kiwei kiwei.
Ka sngi ban pynmih ïa ka Draft Electoral Roll kan long ha ka 29 tarik Risaw 2024, ban pynrung kyrteng bad jingujor 29 tarik Risaw haduh 28 tarik Naiwieng 2024, ki sngi ban pynrung kyrteng 15, 16, 21 bad 22 tarik Naiwieng 2024, ban bishar ne kyntait ïa ka jingpynrung kyrteng lane ujor 24 tarik Nohprah 2024 bad ka sngi ban pynmih ïa ka Final Electoral Roll kan long ha ka 6 tarik Kyllalyngkot 2025.
