Mawkyrwat, Risaw, 20: Ka Deputy Commissioner jong ka South West Khasi Hills District, Mawkyrwat kaba long ha kajuh ka por ka Chairperson jong ka District Level Coordination Committee jong ka 11th Agriculture Census 2021-22 ka la ai ïa kane ka jingpyntip ha baroh ki Myntri bad Rangbah shnong (Village Headman) jong ka South West Khasi Hills District, Mawkyrwat ba ka sorkar India lyngba ka Ministry of Agriculture & Farmers Welfare ka la bthah ban pynlong ïa ka 11th Agriculture Census Survey ha baroh ki distrik kynthup ïa ka South West Khasi Hills District ha kaba ïa ka bynta kaba nyngkong yn sdang ban pynlong ha u bnai ‘Naiwieng (November) 2022 bad yn pynkut ha u bnai Nohprah (December) 2022.
Ha kaba ïa dei bad kane ki nongwan lum jingtip (Enumerators) ba la thung da ki bor distrik kin sa leit sha ki shnong ba la pynkhamti ha ki na ka bynta ban lum jingtip lyngba ki Smart Phones/ Tablets halor ka jingdon bad ka jingpyndonkam ïa ki jaka rep jaka riang da ki longïing, ki kynhun, ki hima bad kiwei kiwei de.
Namarkata, la kyrpad ïa ka jingïarap bad ka jingïasnohktilang baroh ki nongshong shnong khnang ba ka kam kan long kaba jop bad kaba biang por na ka bynta ka jingbit jingbiang bad ka jingmyntoi ïa ki nongrep, ki shnong ki thaw bad khamtam ïa ka distrik bad ba kane ka jinglum khanasamari kan long hi na ka bynta ka jingmyntoi bad ka bit ka biang ki nongrep.
