Yn sangeh treikam khlem buh por ka NEHUNSA ba slem thungkam bad kyntiew kyrdan ïa ki nongtrei

Shillong, Naiwieng 01: Ki non-teaching staff hapoh ka lama jong ka North Eastern Hill University Non-Teaching Staff Association (NEHUNSA) ki la rai ban sangeh treikam khlem buh por naduh ka 4 tarik mynta u bnai kum ka dak ka jingpyrshah halor ka jingpynslem kaba khlem nongrim ban kyntiew kyrdan bad ka jingthep ïa ki kam kiba la dep ban pynbna naduh ka 3 tarik u Naiwieng, 2023.
Ïa kane ka rai la shim ha ka jingïalang kaba la long ha ka 29 tarik u Risaw mynta u snem.
Ha ka jingthoh ba la pynmih ha ka sngi Thohdieng, u president jong ka NEHUNSA Dr WR Synrem u la ong ba manla ka por la phah ki jingthoh sha ki bor badei peit ban pynsted ïa ka jingthung kam hynrei kane ka jingphah jingthoh imat ka long kumba la phah sha ki shkor kiba kyllut.
Ïa ka jingthung kam la dei ban pynlong da ka National Testing Agency (NTA) hynrei kaba sngewsih ka long ba ka NTA ka la phai pynban sha ka University ha ka 16 tarik u Naitung, 2024 ka bym dei ha ka kyrdan ban pynlong ïa ka jingthung kam.
Halor kane, ka dei ka kamram jong ka University ban pynmih ïa ka Expression of Interest bad ïa kane ka juh la leh ha kaba ka tarik ba khatduh ban aiti ïa ki kot ki sla ka dei ha ka 30 tarik u Nailur 2024. Mynta wat la ïaid ki bnai, ym don kawei ruh ka single agency kaba la dep ban shim ka jingkitkhlieh ban pynlong ïa kane ka jingthung kam.
“Ka NEHUNSA ka la ai por ïa ki bor badei khmih ba ïa ki Syllabus bad ka tarik ban pynlong ïa ka written exam dei ban pynbna bad pynmih noh mardor, kaba slem eh ka dei ha taïew ba khatduh u bnai Risaw, 2024. Lada ym lah ban pynmih ïa katei ka jingpynbna kan pynbor ïa ngi ban pynlong ka jingïakhih kaba sangeh treikam khlem buh por ka ban sdang naduh ka 4 tarik mynta u bnai, 2024 ban pynbor ïa ki bor ba dei peit ban pynurlong ïa ki jingdawa jong ngi,” ong u Dr Synrem.
“Ka donkam ban kdew ba ki bor pynïaid ka University ki la pyntyllun ïa ki kam da ka jingduna ki regular staff bad lada ym lah ban pyndep ïa ka jingthung kam kan lah ban pynsangeh, pynkut ïa baroh ki rukom treikam jong ka University, kumta kane pat kan pyndkoh ïa ka kam pule puthi bad ka lawei jong ki samla hapoh ka jylla,” u la bynrap.
Shuh shuh u Bah Synrem u la ong ba ka NEHUNSA, kaba dei ka seng kaba don ïa ka jingkitkhlieh, kam kwah ban ïohi ba tang kane ka Central University hapoh ka jylla Meghalaya, ba kan dkoh na ka daw ki jingbym biang u khlieh ka Administrative.
“Ka NEHUNSA ka sngewkhia ruh halor ka jingpynslem ban kyntiew kyrdan ïa ki nongtrei kiba dei hok kiba la shakri ïa ka University la palat 10 snem. Kane ka jingbym lah ban pyndep ïa ka kam ne jingpynslem la dei hi ban kynnoh ïa ka jingdkoh ka jingtreikam jong u Administrative Head ne khlieh ka Skulbah,” u la ong da kaba bynrap ba ka general body ka la shim ïa ka rai ban ai ruh ka jingkyrshan ïa ka NEHUTA bad NEHUSU ha ki jingdawa jong ki bad la phah ruh ïa ka shithi jong ka jingkyrshan sha kitei ki seng halor kane ka kam.