Shillong, ïaïong 08: Ka Khasi Students’ Union (KSU) ka la pyntip ba kan sangeh lut ïa baroh ki jingtreikam ha ka 9 tarik u mynta u bnai namar ba kan leit sha ka jingon tep ba donburom ïa u President barim ka Seng, u Bah Robert Kharshiing, uba la khlad ha ka 7 tarik mynta u bnai.
Ka Seng ka la pynpaw ïa ka jingsngewsih kaba khraw halor ka jingkhlad noh jong uen u nongïalam barim ka Seng.
Ka Seng lyngba ka kyrwoh na u Samla Lambok Marngar, President bad u Samla Donald Thabah, General Secretary, ka ong ba ha kum kane ka khyllipmat kaba kthang bad ba u lyoh ba dum u wan tap ïa ka ïing ka sem jong une u rangbah, ka buh ki jingduwai ba U Blei Trai kynrad Un pyntngen bad sop ban spaiñ pat ïa ki jingpangnud kum ka ïing kaba ïakynduh kum kine ki jingjia.
Ka Seng ka pynkynmaw ba u Bah Robert Kharshiing u dei u wei pat u Rangbah u ba la kit la bah ïa ka Lyngkor jong ka Jaitbynriew lyngba ka Seng KSU ha kaba u la long ruh kum u President Ba Rangbah ha ka Samoi Treikam 1981 haduh 1984, dei ha ka por jong une u Rangbah ba la shna ïa ka lama rong Jngum (Blue) bad ruh ïa ka Riti Treikam (Constitution) kaba nyngkong eh jong ka seng.
“Kum ka Jaitbynriew ngi dang sngew kitram da shisha ban duh kloi noh kum ia une u Rangphawar uba ju kren beit ïa ka hok bad ka jingshisha na bynta ka bit ka biang u paid shi tyllup ka Ri u Laiphew Syiem Khad Ar Daloi”, la ong ka kyrwoh.
