Shillong, Naiwieng 04: Ka Meghalaya Football Association kan sangeh noh shipor ïa ka Meghalaya State League 2024 kaba dang ïaid shakhmat hadien ba la pynkut ïa ka jingïalehkai Group Stage na ka bynta ban ai por bad pynkhreh ïa ka kynhun ïalehkai jong ka jylla sha ka Santosh Trophy 2024-25.
Ka jingïalehkai ba nyngkong jong kane ka lympung ba la pynïaid da ka All India Football Federation na bynta ki shynrang kan long mynta u bnai bad kumba ju long barabor ka MFA ka shimkhia bad kheiñkor ïa ka kynhun ïalehkai jong ka jylla kum kaba kongsan tam.
Mynta ka kynti ka Meghalaya ka la shah pynïakap ha ka Group D bad ka Assam, Sikkim bad Tripura. Tang ki lahduh jong ki Group kin ïohrung sha ka wat ïakhun kaba bud, kaba long kaba kongsan ïa ka synjuk ban pynkhreh bha ïa ka kynhun na bynta kane ka lympung.
Ki rangïalehkai kiba mih madan ha ka lympung MSL na ki klob bapher bapher kiba ïasoh bad ka MFA, ka synjuk kan shim bun na kine ki kynhun ïa ki rangïalehkai ban mihkhmat ïa ka jylla. Katba ka MSL ka la ai por pura ïa ki rangïalehkai ban kilanmet, ka long kaba kongsan ban lait na kino kino ki jingmynsaw shuwa ka Santosh Trophy bad ba kin lah ban kilanmet kum kawei ka kynhun. Ki jingïalehkai Group Stage ba khadduh jong ka MSL 2024 kan long ha ka 7 tarik Naiwieng.
U Bah Sunesh Syiem, General Secretary ka MFA, bad u Dr Lumbor Mawsor, u Director ka MSL 2024 Tournament hajuh ka por u Vice-President ka MFA, ki la pyntip ha ka Lah sngi U Blei ba ka jingthmu ban pynlong ïa ka quarterfinal ha ka 11 tarik Naiwieng bad ka semi bad ka final ha ki sngi kiba bud hynrei kane kan nym ai por biang ïa ka kynhun ïalehkai ka jylla ban pynkhreh na ka bynta ka Santosh Trophy.
Haba phaidieng, ka Meghalaya ka la wan ba ar ha ka Santosh Trophy 2022-23 bad ka MFA ka thmu ban ïakhun tyngeh na bynta ka burom mynta u snem.
Ka MFA ka lah ban pynlong ïa ka wat ïakhun knock out jong ka MSL lada ka ïoh por paka hapdeng ka wat nyngkong bad ka wat kaba khatduh jong ka Santosh Trophy lane ban ap haduh da kut ka wat kaba khatduh. Ka Association ka don ka jingkyrmen bad ngeit skhem ba ka Meghalaya kan lah ban seisoh ha ka Santosh Trophy bad kan sa ai jingtip shuh shuh halor ka kynhun ïalehkai ha ki sngi ban wan.
