Shillong, Jymmang :Ka Deputy Commissioner, EKHD, Shillong, I Kong Isawanda Laloo da kane ka pyntip paidbah ba na ka liang ka sorkar India lyngba ka Ministry of Home Affairs kan ai ïa ka khusnam riewshlur ba la tip kum ka “Jeevan Raksha Padak Series of Awards, 2022” na ka bynta ki kam leh shlur, kata ha ka ba pyllait im ïa ki para mynsiem briew ha ki jingjia kum ka jingngam um, jingpluh ding, shah bat bording, jingtwa khyndew, ka jingshah thombor ha ki mrad bad halor ki kam pyllait im na ki jaka tih par bad kiwei kiwei. Kumba ka kyrteng jong ka khusnam ka kdew, kane ka jingai khusnam ka long na ka bynta kito ki briew ki ba pyllait im ïa kiwei pat ki para briew.
ïa kane ka khusnam yn sam ha ki lai bynta, kata ka Sarvottam Jeevan Raksha Padak, Uttam Jeevan Raksha Padak bad ka Jeevan Raksha Padak.
Kino kino ki ba sngew dei katkum kane ka jingpynpaw ki lah ban phah ïa ki jingtip sha ka ophis jong ka DC ka EKHD, Shillong na ka bynta ban bishar bniah bad na ka bynta ban ai ïa ka jingmynjur sha ka sorkar pdeng. Lah ruh ban download na ka District Website.