Shillong, Naiwieng 15: U Myntri Rangbah ka jylla u Conrad K Sangma, ha ka sngi Thohdieng u la plie ïa ka jingpynitynnad kaba la shna thymmai hapoh IGP Point ha Shillong.
Kane ka jingpynitynnad ïa katei ka jaka ka dei ruh shi bynta jong ka Re-Imagining Streets Initiative kaba la plie ha u bnai Lber 2024.
Haba kren ha ka jingïalang na ka liang u Myntri Rangbah u Conrad K Sangma, u la ong ba watla ka jingshna ka dei ha ka jaka kaba rit hynrei kadei pat ka sienjam jong ka jingpyrshang ban kyntiew ïa baroh ki liang ïa ka nongbah Shillong bad u la pyntip ba kum kine ki jait jingtei yn sa nang buh ha kiba bun ki jaka.
“Ka long kaba kongsan na ka bynta jong ngi ba ngi la pyndonkam ïa kane ka jaka kaba rit ba kan long kaba itynnad kaba dei ruh hapoh ka nongbah Shillong,” ong u Myntri Rangbah.
Na ka liang u Myntri Rangbah u la pyntip ruh ba ka 4 Star Hotel kaba ha Orchid Polo la dep ban pynbiang bad ka jingtei pat shen yn sa sdang noh. “Ngi pyrshang ban pyndonkam khambun katba lah ïa ki tiar bad ki jaka jong ka sorkar bad ha kine ki 12 bnai la khmih lynti ban lah ban pynitynnad ïa ka nongbah Shillong,” u la bynrap.
U la pyntip ruh ba ka Integrated Command Centre ka la don ha ka kyrdan sa ban pyndep bad ban plie ruh shen.
U la ong ruh ba ki tiar ba la pyndonkam na ka bynta ban pynitynnad kidei kiba la ïoh hi na kane ka jylla.
Ha kane ka sngi la donlang u Symbud Myntri ka sorkar jylla u Bah Sniawbhalang Dhar bad kiwei ki heh ophisar ha kaba ki la ïaid pat da ka kjat ban leit sha Secretariat.
