Shillong, Jylliew :Ka Synjuk ki samla ka Seng Khasi Ri Raid Laban kan rakhe ïa ka lyngkhuh snem ka ba 32 jong ka ha ka 25 tarik mynta u bnai ha ïing seng Khasi Ri Raid Laban Lumshatsngi, kata hadien ba ka Synjuk kam shym la lah shuh ban pynlong ha ka 18 tarik mynta u bnai na ka daw ka jinglong jingman ka suiñ bneng.
Ha kane ka sngi kan don ruh ka ‘cultural programme’ ha ka ba yn wan ïashim bynta da ki kynhun ki ba na sor bad khap sor lyngba ki jingrwai, ki jingtem sur tynrai, ka shad tynrai katkum ka deiti tynrai jong ka jaidbynriew.Ha kane ka sngi yn pyllait ruh ïa ka thup jingrwai Seng Khasi Ri Raid Laban ba la ai kyrteng “Na la Rympei Vol-II.
Kumta sa shisien ka Synjuk ka pyntip sha kito baroh ki ba la ïashim ïa ki card ki ba ka synjuk ka la pynkhreh ba kin sngewbha ban ïa wan sakhi lang ha katei ka sngi (25.06.2022) hapoh ïing seng khasi ri raid Laban khnang ba ka jingpynkhreh jong ka Synjuk kan long ka ba iphuh iphieng.
Ha kajuh ka por na ka liang u president u pynpaw ba ka kynhun ka la trei shitom ban ïoh pyllait ïa ka thup jingrwai seng ka ba ar da ka jingkyrshan lang ki seng kynthei, ka JPK seng khasi ri raid laban, ryngkat lang ki parakur ki parakha.Kane ka dei ka sien ka ba nyngkong ha ka bri u hynñiewtrep ba ka jingrwai seng khasi la khleh lang ha ka ktien khasi bad ka ktien pnar, kumjuh yn pyllait ruh ïa ki jingrwai sengkhasi ha ki smart card pendrive.
Shuh shuh ka Synjuk ka kyntu ruh ïa baroh ba kim bit ban kopi tuh ïa ki jingrwai seng, hynrei kin ai ka jingkyrshan da ka ba shu thied ïa ki original kopi.Kane ka long katkum u kyrwoh lyngba u Bah Skhemborlang Kharmaw-phlang, President ka Synjuk ki Samla ka Seng Khasi Ri Raid Laban, Shillong.
