Nongpoh, Nailur 18: Ka Ri-Bhoi Tourism and Environmental Development Forum (RBTEDF) kala rai ban rakhe ïaka World Tourism Day ne ka sngi ki nongjngohkai pyrthei kaba 44 haka 27 tarik mynta u bnai halor ka phang Tourist and Peace.
Haba kren sha ki lad pathai khubor naka liang u Bah Plielad Tiewsoh Chairman ka RBTEDF u la pyntip ba ïa katei ka jingrakhe yn sdang shuwa da ka jingmareh marathon haka por 6 baje mynstep naduh Umbang sha Orchid Umiam bad kum ka kynhun haka jingïatreilang bad ka Dorbar Shnong Umiam kala rai ruh ban ïatreilang ban pynkhuid ïaka jaka jngohkai pyrthei bala pynbit pynbiang da ka shnong Umiam kaba don ha rud surok bah National Highway.
Shuh shuh ka seng kan sa pynlong ruh ka prokram lyngkot ban sam ïaki khusnam bad ki jingshad jingrwai ha lad Orchid Lake Umiam ryngkat ka prokram hikai ha katei ka sngi.
