Shillong, Lber 27 : Ka National Institute of Technology (NIT) Meghalaya, Sohra kan rakhe ïa ka Sngi ba la Seng Nongrim ïa ka ne ka Foundation Day ha ka 1 tarik Iaiong 2025 ha ka Compus jongka kaba ha Sohra.
Kane ka jingrakhe ba mynta u snem kan long kaba kyrpang bha namar kan long ka sien ba nyngkong eh ban ïoh rakhe ïa kane ka sngi ha ka Campus ban neh junom jongka NIT hadien ba la dep pynkynriah ïa ka na Shillong sha Sohra.
Ha une u snem kin bun bha ki prokram kum ki jingai khusnam, ki jingai jingkren bad kiwei kiwei. Mynta u snem ki don 7 tylli ki khusnam na ka bynta ki Samla pule, 3 tylli na ka bynta ki Nonghikai. ki nongwad bniah, 3 tylli ki khusnam na ka bynta ki nongtrei, kawei ka khusnam na ka bynta ki ophisar bad 11 tylli ki khusnam ba kyrpang kiba la bteng ban ai ka jingshakri palat 10 snem ha ka NIT Meghalaya.
Nalor kane ki tnad pule bapher bapher kin pyni ruh ïa ki sap ki talen lyngba ki jingwad bniah jongki, ki jinglap jongki ha ki jingwad bniah kiba thymmai bad kumta ter ter. Yn don ruh I Prof Amitava Ghosh na ka IIEST Shibpur kum u kongsan, u Prof. Rakesh Sehgal na ka NIT Hamirpur kum u symbud kongsan bad Dr Wang Yi na ka Hamburg University of Technoloty, Germany kum iba la shah khot kyrpang ban ïadon bynta ha kane ka sngi.
Shuh shuh ha kane ka sngi yn pyni nam ruh ia ka jingshna jong uwei na ki Nonghikai na ka Electrical Engineering Department ïa ka kali Electrict kaba tad dor bha kaba lah pat ban kit jingkit ha kine ki jaka lum. Ka kynhun ba shna ïa kane ka kali ka dang pyrshang ban pynmih bun ïa kine ki kali ban pyndonkam ha ka kit ka bah hapoh ka Campus.
Nalor kane ka NIT Meghalaya, Sohra kan pynlong ruh ïa ka Cultural Fest Shishir 2025 naduh ka 3 tarik haduh ka 5 tarik Iaiong mynta u snem bad ia kane yn pynlong da ka Student Activity Centre (SAC). Ha kane ka cultural prokram kin don bun ki jingïalehkai, kum ka Flash Mob,Dance Competition, Drama Competition, Food Fest, Open-mic, Panache bad kiwei kiwei. U Director jongka NIFT Shillong un long u konsan ha kane ka prkram.Mynta u snem la kot ruh ia u nongïoh khusnam Padma Shri u Pandit Satish Vyas na ka SPIC MACAY Heritage Club ban put tem bad rwai ha kane ka prokram ha ka sngi ba nyngkong bad ha ka sngi ba ar ïa u Playbah Singer ba paw ka India u Tushar Joshi.
