Nongstoiñ, Naiwieng 06: Kum ka jingïasnohkti lang bad ki paitbah nongshong shnong ha ka ri baroh kawei ïa ka jingdap shispah sanphew snem jong ka sngi kha jong u Vallabbhai Jhaverbhai Patel u ba ka pyrthei baroh ka tip kum u Sardar Vallabhai Patel, u ba la bat ruh kum u Symbud Myntri Rangbahduh ka ri naduh u snem 1947 haduh u snem 1950 hadien ba la ïoh ïa ka jinglaitluid, ki bor pynïaid district jong ka West Khasi Hills ryngkat ka jingïatreilang bad ka ophis jong u District Sport Officer Nongstoiñ, kan pynlong ïa ka jingrakher kaba kyrpang ka ban sdang naduh ka 11 tarik mynta u bnai.Ha ka jingrakhe ïa katei ka sngi ba kyrpang yn pynlong da ki prokram bapher bapher kum ki jingïalehkai sport, cleaning drive, cultural programme bad kiwei kiwei.
U bah Isaack Momin MCS u ba dei ruh u Extra Assistant Commissioner haba ai jingkren ha ki lad pathai khubor mynta ka janmiet, u la ong ba ka jingpynlong ïa ki prokram bapher bapher ha katei ka sngi, ka dei namar ba ka dei ka National Unity Day lane ka sngi ba kyrpang jong ka jingïatylli ka jingïalong kawei jong ki 1.4 million ngut ki paitbah nong shong shnong hapoh ka ri, khlem da don ka jingsngew ïapher ha ka imlang sahlang, watla ki don ha la ki jong ki jong ki jait niam, jaitbynriew, ka riti ka dustur, ka ktien ka thylliej bad kiwei kiwei, hynrei ki don tan kawei ka jingsngew kata ka long ba ngi dei ki nongshong shnong jong ka ri India.U bah Momin u la ong ruh ba ïa katei ka jingrakhe yn sdang ha ka por 9 baje mynstep ha Indoor Stadium New Nongstoiñ, da kaba pynlong ïa ka jingïamareh thong, ha kaba yn wan ban ïashim bynta da ki pule jong ki skul bapher bapher napoh ka district. Nalor kata yn pynlong ruh ïa ka cleaning drive bad ki cultural programme ki ban pynsngew tynnad ïa ki paitbah. Kumta u la kyntu ïa ki nongshong shnong ba kin wan ban ïadon lang bad ban pynshngaiñ ha katei ka sngi, khnang ba ka jingrakhe kan long kaba jop.
