Shillong, Nailur 27: Kum shibynta jong ka jingrakhe ïa ka Silver Jubilee, ka Bharat Sanchar Nigam Limited (BSNL) ka la pynlong ïa ka jingïalang bad ki nongthoh khubor ban rakhe ïa ka jingpyntreikam ïa ka 4G technology ba shna hi hapoh ka ri ha kylleng ka thaiñ Shatei Lammihngi.
U Myntri Rangbah duh un pyllait paidbah ïa kane lashai ka sngi, ha Jharsuguda, Odisha, ban aiti ïa ki 92,633 tylli ki jaka ba thymmai kiba ïadei bad ka 4G, ba kynthup ïa ki 14,000+ ki tower hapoh ka 4G Saturation Project. Kane ka jingjop ka buh ïa ka India hapdeng ki san tylli ki ri ha ka pyrthei kiba don ka telecom stack la jong ba pura, kaba plie lad ïa ka jingsdang ïa ka 5G ha ki por ban wan.
Ha ka NE1 circle hapoh ka 4G saturation project baroh kiba la thmu ban shna ki long 406 tylli ki tower (Meghalaya- 238), Mizoram- 53 bad Tripura- 115) bad haduh mynta baroh 246 tylli ki tower kiba la dep pyntreikam (Meghalaya-136, Mizoram-17, bad Tripura- 93).
Kane ka rynsan Swadeshi 4G ka kynthup ïa ki 12 tylli ki District ha Meghalaya, 9 tylli ki District ha Mizoram bad 8 tylli ki District ha Tripura da kaba buh baroh 1278 tylli ki tower ha kaba la antad ba ka jinglut jong ka projek kan long T. 1092 klur. La pynïar shuh shuh hapoh ki projek BOP BIP bad Phase IX.2, kaba pynïar shibun ïa ka jingpynïasoh sha ki jaka khappud bad ki jaka ba jngai.
Hapoh ka projek BOP BIP baroh ki don 18 tylli ki tower ba la thmu (Meghalaya-15, Mizoram-3) bad haduh mynta 2 tylli ki tower la pyntreikam ha ka jylla Meghalaya. Hapoh ka projek Phase IX.2, ka ban ai jingmyntoi ïa ka jingpynïasoh mobile 4G kaba stet bha sha baroh ki bynta jong ka jylla, ka lah ban sa pynkylla sha ka rynsan 5G kaba stet bha shen. Ha ka NE1 circle, baroh ki tower kiba la thmu ban shna ki long 848 tylli bad ki don 262 tylli ki tower ha ka jylla Meghalaya bad haduh mynta, ki don 252 tylli kiba la dep ban pyntreikam.
Haba kren ha kane ka jingïalang, ka Chief General Manager jong ka BSNL, NE-1 Circle, ka Kong Daily Giri, ka la ong, “Da kane ka jingpyntreikam ïa ka 4G ba la shna hi hapoh ka ri, ka India ka don mynta hapdeng ki ri kiba lah ban shna bad pyndonkam ïa ka teknoloji telecom lajong. Kane ka jingplie paidbah ka long kum u mawmer ïa ka BSNL bad na ka bynta ka jingïaid lynti ka ri ha ki kam digital.”
Ka la bynrap, “Kane ka projek kan wanrah ïa ka jingïadei kaba jemdor bad kaba lah ban shaniah sha ki katto katne ki jaka ba jngai tam jong ka ri, kaba pyndap shisha ïa ka jingduna ha ka kam digital bad kaba pynkupbor ïa ki nongshong shnong.”
Ka la kdew shuh shuh, “Ka BSNL ka la sdang ïohnong ha kine ki bnai ba dang shu dep, bad da ka jingkyrshan jong ki jingthmu jong ka Sorkar India kum ka 4G Saturation Project, ngi ngeit skhem ban pynneh ïa kane ka jingkiew katba ngi dang ai ïa ki jingshakri kiba ïahap bad ki jinglong jingman ha kylleng ka pyrthei.”
La ai ki jingtip halor ka jingïar jong ka jingsdang kam, ki jinglong teknikal jong ka stack ba la shna hapoh ka ri, bad ka bynta jong ki nongïatreilang kum ka TCS, C-DOT, Tejas Networks, HFCL, bad Ceragon ha kaba tei ïa ki bynta bapher bapher jong ka “Swadeshi 4G”. Ki heh sorkar ki la pynpaw ïa ka jingdonkam ba kongsan jong kane ka kam na ka bynta ka pule puthi, ka koit ka khiah, ki jingshakri ha ka pisa tyngka, bad ka jingpahara ha ki jaka khappud.
Ha kane ka jingïalang la wan ïashim bynta ka Kong Daily Giri, Chief General Manager ka BSNL North East-1 Circle; Thaiu Mag, u Principal General Manager (Sales and Marketing); H. L. Nongkhlaw, Principal General Manager (Consumer Mobility); C. Lalhmachhuana, Principal General Manager (Consumer Fixed Access); P. K. Barapatre, Senior General Manager (HR); R. K. Soni, General Manager (BharatNet); K. Patton, General Manager (Enterprise Business); bad G. Pathak, Financial Adviser, Ophis jong ka CGMT.
