Shillong, Nailur: Ka All Primary School Teachers’ Association (APSTA) mynta u snem ruh kan bteng ban rakhe ïa ka lyngkhuh sngi ïap kaba 174 snem jong u Rev (L) Thomas Jones I, ïa uba la tip bha ruh kum u kpa jong ki dak thoh Khasi ne Khasi Alphabet ha ka 16 tarik mynta u bnai ha Umkor Urksew Stadium Pynursla naduh ka por 10 baje mynstep.
Ha kane ka sngi yn ïa don lang ruh u Bah Prestone Tynsong, Symbud Myntri Rangbah ka jylla kum u Kongsan, bad u Rakkam A Sangma Myntri ka tnat pule puthi ka jylla kum u Symbud Kongsan.
Ka Seng ha u kyrwoh lyngba u Bah FC Shullai, General Secretary lyngba une u kyrwoh ka pyntip ruh ba kane ka jingrakhe kan ïaid ryngkat bad ka jingdap 181 snem ka jingsdang ia ki skul Primary hapoh ka United Khasi bad Jaiñtia Hills.
Ha kane ka sngi kumba la ju leh naduh ka snem 1992 ter ter, ka APSTA kan noh synniang ruh ïa ka pisa kaba long mar T.50,000 sha ka Christmas Make Over 2023 jong ka Ri Khasi Channel kumjuh sha ka Pynursla Parish bad sha ka NEIMA Pynursla.
Kumta na ka liang ka Seng ka kyrpad ïa baroh ki dkhot na baroh ki unit jong ka Association ba kin pyllait khnang khnang ïa ka por ka jong ki ban ïa don ryngkat lang ha katei ka jingrakhe.
