Yn rakhe dap 125 snem ka Shnong ba thaw namar u jumai bah 1897

Shillong, Naiwieng 08: U jumai bah uba la khie ha Ri Khasi ha u snem 1897, kata 125 snem mynshuwa, ym tang ba u la wanrah ka jingjot jingpra jong ki ïing sorkar bad ki ïing briew, hynrei u la wanrah ka jingphet ne ka jingkynriah shnong jong kiba bun tylli ki Shnong.
Kawei na kine ki Shnong kaba ki nongshongshnong ki la kynriah ban leit shong shnong noh ha kawei ka jaka kadei ka Shnong Tyrna, kaba long ka Shnong kaba don ha ki thaiñ Riwar Sohra.
Mynta ka Shnong ne ka Elaka Tyrna kan rakhe ïa ka jingdap 125 snem kane ka jingphet shnong na ka Shnong rim sha ka Shnong thymmai, kaba ka jingïajngai kawei na kawei ka long tang kumba shiteng kynta da ka kjat.
U Bah Andreas Wansai, Sirdar jong ka Elaka Tyrna, u la ïathuh ba ka Shnong ban rakhe ïa ka jingdap 125 snem jong kane ka jingleit pynlong shnong sha ka Shnong Tyrna ba mynta ha ka 7 bad 8 tarik u Nohprah 2022.
“Kane kan long ka jingrakhe ban pynsah kynmaw ïa ka jingphet ki briew na ka shnong rim sha ka shnong thymmai namar ka jingshah pynjot ha u jumai bah ha ka snem 1897”, la ong u Sirdar haba ïakren bad ki nongthoh khubor ha Shillong Press Club mynta ka sngi.
U Bah Andreas u la ïathuh ba katkum ka jingïathuh khana pateng, la ong ba ka shnong rim ka la shah pynjot ha utei ku jumai ba bna nam ha u 1897 bad ki briew ki la ïaphet noh sha ka jaka ba kham shaneng namar ka kham biang bad khamsuk ka leit ka wan. Hynrei ki dak ki shin jong ka shnong rim ki dang sah haduh mynta kum ki kynroh ïing ki jaka shongkai bad kiwei kiwei.
Na ka liang u Sirdar u khot u wer ïa ki nongshongshnong jong ka Elaka kiba la sah ha kylleng kylleng ki jaka jong ka Ri Khasi Jaiñtia ban ïawan lang sha kane ka jingrakhe.
Ha kajuh ka por ka Shnong lyngba ka Tourism Management Committee ha kitei ki arsngi kan pynlong ruh ïa ka Living Roots Festival kaba ar. Ha kane ka Festival nalor ki prokram ba bun jait, kum ki marathon, ki jingpyni nam ïa u soh u pai, ka jingïalehkai puh syiar, ïaleh maw point, tan tyllai, fancy dress kan don ruh ka Miss Living Roots, ha kaba ki nongïashim bynta kin long ki Samla Kynthei ba la palat 18 snem shaneng bad tang kiba hap hapoh Shella Constituency. Ka Miss Living Roots kan ïoh rah ïa ka khusnam da ka pisa 30,000 tyngka ryngkat ki jingai sngewbha, ka First Runners Up kan ïoh 15,000 tyngka bad ki jingai sngewbha bad Second Runners Up kan ïoh 10,000 tyngka ryngkat ki jingai sngewbha.
U Chairman jong ka Living Roots Festival, u Bah Donborlang Marbañiang, u la ïathuh ba ïa kane ka Festival la pynlong ryngkat ka jingïatreilang ka tnad Tourism jong ka sorkar jylla bad kumjuh ruh ka sorkar pdeng.
U Secretary ka Living Roots Festival, u Bah W. Majaw, u la ïathuh ba ha Elaka Tyrna ki don artylli ki jingkieng thied ba im, kiba la jan kot sha ka shispah snem ka rta bad kaba kham jrong kadei ka kaba 85 phut bad kadei ruh kaba ar ha ka jingjrong ha jylla Meghalaya. U la ïathuh ruh ba haduh mynta ka shnong lyngba ki briew kiba tip bha ïa ka rukom sumar bad pynneh pynsah ïa kine ki jingkieng ka dang sumar bad pynbha ïa kine ki jingkieng kiba ladon naduh ka por u mymbarim.