Shillong, Nohprah : Ka Nongshluid Govt LP School kan rakhe ïa ka jingdap ba 100 snem ha ka 17 tarik u Nohprah 2022.
Ha kane ka jingrakhe kan don ka jingplie ïa u mawmer ka synjat kynmaw tympang jong ka jingïaid lynti ba 100 snem jong kane ka skul kaba don Nongshluid ha Mawsynram. Ha kane ka sngi ka skul kan don ruh ka jingrakhe lehkmen Khristmas nalor kiwei ki prokram da ki khynnah skul bad ki nongshong shnong. ïa kane ka jingrakhe la ïasnohkti lang da ka shnong Nongshluid.
Kat kum ka kyrwoh na u Secretary ka Managing Commiittee, kane ka skul ka dei kaba la seng naduh ki 1920 ha kane ka shnong bad la wan hikai nyng kong eh da u shipai Khasi ha ka por ka jingsynshar phareng na Sohra bad hapdeng kine ki 100 snem ka skul ka lah ban ai jinghikai ïa ki khynnah bad la sngewthuh ba kane ka skul kan dei ka skul sorkar kaba rim eh ha ki thaiñ Mawsynram.
Kane ka skul kala lah ban pynmih shibun ki samla pule kiba la kiew shaphrang ha ki kyrdan bapher bapher.
Kumjuh ka skul kala wer ïa baroh ki khynnah skul ba rim jong kane ka skul bad ki nongshong shnong baroh ba kin wan ïa don bynta lang ha kane ka jingrakhe.
