Shillong, Naitung 07 : U Myntri kam pynmih bording u Abu Taher Mondal ula pyntip ba ka Meghalaya Energy Corporation Limited (MeECL) ka la rai ban pynjynsur noh ïa ki kynta pynlip bording da ki bynta bynta.
“Mynta ka aiom ngi la ïoh pyllang ïa bun bah ka bording da ka jingïakut ba haba don ka jingpynmih tam ïa ka bording, ngi sa pynphai noh sha ki. Ngi dang ïaleh ïa kane ka kam” ong u Mondal.
“Nalor kane, ngi la nang pynduna ruh ïa ka jingthied bording namar ka don ka khep ba ngi la thied ïa ka bording ha ka dor ka ba rem bha. Kumta, ngi sa sangeh ban thied ha ka dor ba rem. Na kata ka daw ngi la pyrshang ban khmih ba kloi katba lah ngin pynduna noh ïa ki kynta pynlip bording. Ka Jingpynlip bording ka lah ban don hynrei ngin pynduna noh ïa ki kynta” ula bynrap.
Haba kylli, u Mondal ula ong “ïa mynta, kam don satia kano kano ka lad ban weng ïa ka jingeh hynrei ïa kaba hadien habud, ngi la leh ïa ki kam bapher bapher ban lah pynbun ïa ka jingpynmih bording, pynduna ïa ki jingduhnong…Ngi la pyrshang ban leh eiei ha ka ban weng noh ïa ka jingeh na ka jingduna bording”.
Ha ka sngi Balang, ka ïing bishar High Court ka la bthah ïa ka Jylla ban ai ïa ka kaiphod kaba bniah kaba kdew halor ki sienjam ban khate ïa ka jingduna bording hapoh ka Jylla. Ka la bthah ruh ïa ka Jylla ban pynpaw ïa ki sienjam ba ka la shim ban pynïoh bording shuh shuh na ka National Grid bad kiwei ki tyllong kiba don ban pyndap ïa ka jingduna bording ha ka Jylla.
U Mondal ula ong ba ka Sorkar Jylla ka burom ïa ka jingbthah ba la ai da ka ïing bishar High Court.
“Phi ïohi ba ha kine ki khyndiat sngi ne bnai, ngi la thied ïa ka bording ha ka dor kaba rem bha kaba kot sha ka T. 3 klur shisngi. Lada ka bording ka don, ngi lah ban thied, kam don jingeh satia ïa kata hynrei ka dor ka dei kaba ngi hap ban peit. Kaba kongsan eh ka dei ka jingdon ka bording ha ki ïew. Ngi thied na ki kompani shimet ruh hynrei ka dor ka long kaba rem bha” ula ong.
