Yn pyrshang ka sorkar ban wanrah kham bun ki prokram ai kam lyngba ki Mission ba bun jait : Conrad K Sangma

Shillong, Rymphang 26 : U Myntri Rangbah ka Jylla Conrad K Sangma ha ka sngi Palei u la ong ba ka sorkar kan hap ban pyrshang ban wanrah bun ki prokram ban aikam lyngba ki mission bapher bapher ban ïakhun ïa ka jingkyrduh kam ki samla ka jylla.
Da kaba kyntait ïa ka jingkynnoh jong ka Liang Pyrshah ba ka ki prokram ai kam jong ka sorkar ki la phiel, u Myntri Rangbah u la ong ruh ki don bun tylli ki prokram jong ka sorkar kum ka FOCUS, CM Elevate, PRIME bad kiwei kiwei kiba la pyni bad pynmih ïa u soh.
Shuh shuh haba jubab halor ka jingkylli ba wanrah da u MLA ka Rajabala u Dr. Mizanur Kazi na ka liang u Myntri Rangbah u la ong, “Kumba 50 persen na ki nongshong shnong jongngi ki dei kiba don hapoh 20 snem ka rta. Kumta ngam ai daw tangba haba ngi ïohi ïa kine ki jingeh ngi hap ban wanrah kham bun ki prokram ban pynmih kam lyngba ki mission bapher bapher.”
U Myntri Rangbah u la kdew ruh ba ha kine ki khyndiat snem ka sorkar ka la lah ban pynmih kam haduh kumba 3.66 lak tylli. “Lehse ngi khlem pat lah ban kot sha ka thong hynrei ka kam ka dang ïaid bad ngi don ha ka lynti kaba dei,” u la bynrap shuh shuh.
Shuh shuh haba pynshai halor ka skim FOCUS, u Myntri Rangbah u la ïathuh ba ka sorkar ka la dep ban mang haduh 140 klur sha ki 22,500 tylli ki Producer Group kaba ai jingmyntoi ïa 2.1 lak ngut ki nongïoh jingmyntoi. U ong ruh ba ka FOCUS+ ka la poi sha ki 1.5 lak ngut ki nongïoh jingmyntoi. “Kiba bun ki nongrep ki la ïoh jingmyntoi bad ki la ai sakhi ba na ka song pisa kaba ki ïohi ka jingpynmih ka la nang kiew. Ngi sngewtikna ba kane kan ai ka jingmyntoi kaba khraw ha ki por ban dang wan.”
Nangta, u Myntri Rangbah haba pynshai halor ka skim sengkam lajong, u la ong ba ka CM-Elevate kaab dei ka prokram flagship jong ka jylla ka la plie lad ïa ki nongseng kam lajongh, ki kam jngohkai pyrthei, ki kam ïalehkai bad kiwei kiwei ki bynta.
“Tang hapoh 20 sngi, ngi la ïoh pdiang haduh 22,000 tylli ki aplikeshon kaba la bun haduh katta katta haduh ba ngi la hap ban khang noh shipor. Ki paidbah ki dang lah ban aplai mynta lyngba ka Meghalaya One portal,” u la ong.
Shuh shuh haba jubab halor ka jingkylli ba wanrah da ka MLA jong ka Shillong East Kong Ampareen Lyngdoh, u Myntri Rangbah u la ong ba ki paidbah ki lah ban dial ha u 1971 ban ïoh jingtip ïa kino kino ki skim.