Kolkata, Jymmang 05: U Myntri korbar ri jong ka ri India, u Amit Shah, u la ong ba ka sorkar kan pyntreikam noh ïa ka Citizenship Amendment Act tang shu kham duna ki jingteh kyndon na ka jingpang COVID 19.
Haba kren ha ka jingïalang paidbah ha Siliguri mynta ka sngi, u Shah u la ong ba ka sorkar kan pyntreikam beit ïa kane ka aiñ ha baroh kawei ka ri India. “Ngin pyntreikam noh ïa kane ka aiñ tang shu kham kham synjor ki kyndon ba la buh ban teh lakam ïa ka jingsaphriang ka jingpang COVID 19”, la ong u Myntri ka sorkar pdeng.
U Shah u la kyntait ruh ïa ka jingpynphriang khubor ka Myntri Rangbah jong ka West Bengal, ka Mamata Banerjee, kaba la ong ba ka sorkar pdeng kan nym pyntreikam satia. “Ka Myntri Rangbah jong ka West Bengal, kadei ka briew kaba ju mlien ban ïalam bakla ïa ki paidbah na ka por sha ka por, wat nym ngeit ïa ka”, u la ong.
Lah ban kdew hangne ba ka kane ka aiñ, ha ka por ba wanrah kum ka Bill ha Parliament, kala wanrah ka jingpyrshah bad ka jingïakhih kaba jur na ki paidbah jong ka ri India,khamtam na ki jylla ka thaiñ shatei lammihngi jong ka ri India, kynthup hangne ha jylla Meghalaya ruh.
Kane ka aiñ ka thmu ban pynlong nong India ïa ki Hindu, ki Sikh, ki Khristan, ki Jaiñ bad kiwei de ki niam rit kiba wan phet na Bangladesh, Pakistan bad Afghanistan sha India shuwa jong ka snem 2015.
Ka jingpyrshah ha ki jylla shatei lamihngi kadei namar ka jingsheptieng ïa ka jingwan rung kyrthep ki briew na Bangladesh, namar ka jingïajan bad ki jylla kane ka thaiñ. Katba sha kiwei pat ki bynta jong ka ri India pat ka jingpyrshah ka long ba kane ka aiñ kan ktah ïa ka jinglong trai shnong ki paidbah ha la ka jong ka ri.
