Yn pyntreikam ka tnad Pulit da ki ‘Radium Reflector’ sha baroh ki kali ha Ri Bhoi

Nongpoh, Ïaïong 04: Kum kawei na ka thong ban pynduna ïa ki jingjia aksiden ba la ju jia khah khah ha ka surokbah National Highway-6 ha Ri Bhoi bad kaba ju wan rah ruh ïa ki jingjia ba sngewsih na ki jingaksiden Kali, ka tnad Pulit Ri Bhoi District shen kan pyntreikam noh da kita ki ‘Radium Reflector’ na ka bynta ki kali paidbah bad ruh wat ki kali sorkar ha Ri Bhoi.
Kum ban pyntip paidbah, kine ki Radium Reflector ki dei ki kynja plastic ba hap ban tah ha baroh ki Kali la ka dei ki Kali paidbah ne ki Kali sorkar kiba don ka bor jong ka jingshai bad lada tah ïa kine ki kynja plastic ka la ïarap shibun ban tip la ki dei ki Kali bai aid ne ki kali ba ieng ha ki surokbah bad bunsien ka jingjia aksiden ka ju jia khah khah khamtam ha ka por mynmiet namar ba don ki Dirbar kiba ym lah ban ithuh ïa ki Kali ba ki ing harud ka surok.
Da jingthmu ban pynduh ïa ki jingjia aksiden kali ha kane ka surokbah, u Superintendent of Police ka Ri Bhoi, u Giri Prasad mynta ka sngi u la pynmih syndon da ka hukum bad ruh ka dei katkum ka Central Motor vehicle Rules 1989 U/S 104, 138 and 138(4)(c ) ba baroh ki jaid kali ki hap ban tah ïa kine ki kynja plastic ha ki Kali ba la tip kum ki Radium Reflector.
Kane ka long ruh ka jingpyntip naduh ki trai kali, ki dribar bad kynthup ruh ki kali sorkar ne ki kali shimet bad wat ki kali kamai paidbah ba kane ka jingtah ïa ki Radium Reflector kan sdang naduh ka 1 tarik u Ïaïong 2022 haduh ka 31tarik u Jymmang, 2022.
La pyntip ruh ba ka don ka jinghap ban siew pisa katkum ka dor ba la buh da ka sorkar ha kaba ki kali ar shaka, bad ki kali saw shaka ki hap ban siew tang Rs. 50, ki kali ba don 6 shaka kan long Rs. 100 bad ki kali ba don 10 shaka kan long Rs. 200 bad ki Ambulance, ki Tractor Trolley, ki skul bus, ki kali pynlip ding bad ki kali sorkar kim donkam satia ban siew pisa na ka bynta ban tah ïa kane ka Radium Reflector.
Shuh shuh, la pyntip ruh ba kane ka jingpyntreikam ïa ka Radium Reflector kan long na ka bynta baroh ki jaid kali naduh ki kali shimet, ki kali sorkar bad ki kali kamai paidbah ba ki hap ban tah ïa ka Radium Reflector bad namar kata ki trai kali, ki dribar la kyrpad ba kin shim khia ïa kane ka bynta ban tah ïa kane ka radium reflector ha ki kali jongki bad lada ki ïaleh pyrshah kin shah pynshitom katkum ka Central Motor Vehicle act kaba dei katkum ka section 104, 138 and 138(4)( c) ka Central Motor Rules-1989, ong ka tyllong khubor na u heh pulit ka Ri Bhoi, u Giri Prasad.