Yn pyntreikam ka Sorkar da ka NCM na ka bynta ban ïoh jingtip ïa ki jinglong tynrai

Nongstoiñ, Ïaïong 05: Na ka bynta ban ïoh jingtip lut ïa ka jinglong jingman jong ki jaitbynriew bapher bapher hapoh ka ri baroh kawei, ka sorkar pdeng lyngba ka Ministry of Culture kan pyntreikam noh shen ïa ka National Mission in Cultural Mapping ha baroh ki jylla. Ka Ministry ka la bthah ruh ïa ka sorkar jylla ba kan pyntreikam ïa katei ka Mission ha baroh ki District.
Kumta na ka liang u bah P.D.Sangma Deputy Commissioner ka West Khasi Hills, u la pyntip ba ha West Khasi Hills ruh yn pyntreikam ïa katei ka Mission. Ka jingpyntreikam ïa katei ka mission, ka long ban lum jingtip ïa ki jingstad tynrai, ki riti tynrai, ki jaka ba pawnam, ki jinglong ba kyrpang jong ki jaka, ki briew ba pawnam, ka mariang, ki buit treikam ba kham kyrpang jong ki jaitbynriew bapher bapher kiba don ha ka ri India.
Ki nongtrei jong ki CSC kiba la tip kum ki Village Level Entrepreneurs kin long ki nonglum jingtip bad ki hap ban leit haman la ki shnong, ban ïakynduh ïa ki nongshong shnong kiba kham tip ïa ka jinglong jingman bad ïa ki khana pateng naduh mynshuwa. Kino kino kiba kwah ban tip kham bha shaphang kane ki lah ban phone ha kine ki number 9436344580/8014673620.