Shillong, Nailur 15: Ka sorkar jylla ka la tyrwa ban pynlut T. 515 klur ban shna ïa ki jingtei ban pynlang ïa ka um ha baroh ki 12 tylli ki district kaba la thmu ban pyndep ha u snem 2031.
Ka sorkar hapoh ka EAP – Climate Adaptive Community Based Water Harvesting Project ha Meghalaya la bei tyngka da ka Asian Development Bank plan ban tei ïa ki jaka pynlang um ha baroh ki 12 tylli ki district, ong ka tyllong khubor ba la ïoh na ki heh ophisar.
Na ka liang ka sorkar ka la ithuh ïa ki 532 tylli ki jaka ha baroh ki 12 tylli ki district ban tei ïa ki jaka pynlang um kaba la tyrwa ha ka snem 2024-2025 haduh ka 2030-2031. Ha ka jingmang tyngka kaba long T. 515.69 klur, ki la ong.
Hynrei ka tyllong khubor la ïathuh ba ka tnat kam shym don kino kino ki project ban ïada ne pynneh pynsah ïa ka Umïew bad Ganol Basin.
Ka jingïada bad ka jingpynneh pynsah ïa ka Umïew bad Ganol Basins la pyntreikam bad peit da ka tnat Soil & Water Conservation.
Ha kajuh ka por na ka liang ka tnat ki kam Khlaw ka dang don ha ki jingtreikam ban ithuh ïa ki tyllong um ha ka jylla kiba dang donkam ïa ki lad jingïada kum ka Riat Laban Reserve Forest, Laitkor Protected Forest, Mawphlang Reservoir kiba ha East Khasi Hills, ka Khri River kaba ha Mairang C&RD Block, Nokrek Biosphere Reserve ha Garo Hills, Umïam Water Reservoir ha Ri Bhoi District, Umphung River ha ka East Jaiñtia Hills District bad Myntdu River ha West Jaiñtia Hills District.
Ka tnat Soil and Water Conservation kum shi bynta na ka jingïatreilang bad ka tnat PHE kan sa shim ïa ki 2 tylli ki sienjam ban pynneh pynsah ïa ki tyllong um bad ban leh ruh ïa ki kam ban pynthymmai hapoh ka Greater Shillong Region, kiba kynthup ïa ka Umpaitmaw kaba hapoh ka Mylliem Block bad Madan Saisiej kaba hapoh ka Mawpat, ïathuh ka tyllong khubor.
