SHILLONG, Risaw 30: Ka Sports Authority of India lyngba ka ka ‘residential’ bad ‘non-residential scheme’ kan pynlong ïa ka prokram pyrshang jied lane ka selection trial ha ki hynriew tylli ki jait jingïalehkai kiba kynthup ïa ka Archery, Athletic, Boxing, Football, Judo bad ka Karate ban pynrung ïa ki khynnah ïalehkai ba don sap ha ka SAI, STC, Shillong.
Kane ka prokram pyrshang jied khynnah ïalehkai kan long ar sngi lynter, katta ha ka 12 bad 13 tarik Naiwieng, 2025 ha Sports Authority of India, NEHU Campus Shillong, bad kan kynthup tang ïa ki khynnah kiba naduh 12 haduh 18 snem. Ka por sdang kan long 8 baje mynstep.
Ka jingjied ïa ki khynnah kan long katkum ka jinglah bad ka jingïashim bynta jong ki ha ki lympung ïalehkai kiba la ïoh jingithuh bad katkum ka jinglah jong ki ban pyni ïa ka sap ha katei ka prokram pyrshang jied – bad kumjuh ruh da kaba pynshong nongrim ïa ki jingjop ha ki kyrdan bapher bapher jong ki lympung ïakop ba la ithuh, kum ha ki lympung kyrdan Inter National, National, State & District Level, bad lyngba ka jingkheiñ jong ka jingthew katkum ka rta jong ki bad ka jingbishar kaba bñiah ïa ka jingtbit bad ka jinglong jong ki shaphang ha ka jait jingïalehkai kaba ki wan ban pyrshang.
La pyntip ba ki khynnah kidei ban wanrah ryngkat bad ar tylli ki dur (passport size) ba dang shu dep shon bad ka Aaddhar card, ka kopi xerox jong ka Birth certificate ba ladep attest bad kumjuh ruh ki sertiphiket sport. Kane ka long katkum ka kyrwoh na u Assistant Director jong ka SAI, STC, Shillong.
Ka tarik, jaka lem bad ki rta jong ki khynnah kiba lah ban shim bynta ha kane ka selection Trial ki long:
1. Archery – kaba hap hapoh ka SAI Residential (na ka bynta ki shynrang bad kynthei).
2. Athletic: kaba hap hapoh ka SAI, Residential (na ka bynta ki shynrang bad kynthei).
3. Boxing: kaba hap hapoh ka skhim SAI, Residential (na ka bynta ki shynrang bad kynthei).
4. Football: (Tang na ka bynta ki khynnah shynrang), kaba hap hapoh ka SAI Non Residential.
5. Karate: (Tang na ka bynta ki kynthei); kaba hap hapoh ka skhim SAI, Residential.
6. Judo: kaba hap hapoh ka skhim SAI, Residential na ka bynta ki shynrang bad kynthei.
Baroh ki trial kin long ha Sports Authority of India, NEHU Campus Shillong; Sdang ha ka 12 bad 13 tarik Naiwieng, 2025. Ka por ba hap ban poi 8 baje mynstep.